"Mos ndani informacione personale"/ Shoqata e Bankave paralajmëron qytetarët për disa telefonata mashtruese

5 Mars 2026, 16:02, Aktualitet CNA

Shoqata Shqiptare e Bankave ka paralajmëruar qytetarët lidhur me disa telefonata mashtruese të realizuara përmes internetit.

Sipas njoftimit të SHSHB-së, personat që telefonojnë mund të komunikojnë në gjuhë të ndryshme dhe të kërkojnë të dhëna të kartës bankare ose informacione të tjera personale me pretendimin për ndalimin e disa veprimeve të dyshuara të kryera me kartën e bankës së qytetarit.

Shoqata e Bankave u bën thirrje qytetarëve për kujdes të shtuar dhe në rastet e një telefonate të dyshimtë të mos ndajnë asnjë informacion personal.

NJOFTIM PËR PUBLIKUN MBI TELEFONATAT MASHTRUESE TË REALIZUARA PËRMES TEKNOLOGJISË VOIP

Shoqata Shqiptare e Bankave dëshiron të informojë publikun mbi disa raste të fundit të telefonatave mashtruese të realizuara përmes teknologjisë VOIP (telefonata përmes internetit).

Në ditët e fundit janë raportuar raste telefonatash nga adresa me prapashtesa si “@gmail” apo platforma të tjera, ku përdoret emër banke. Gjatë telefonatës, në ekran mund të shfaqet emri ose logoja e bankës, duke krijuar përshtypjen se telefonata vjen nga banka, ndërkohë në fakt bëhet fjalë për një përpjekje mashtrimi.

Këto lloj telefonatash realizohen përmes internetit dhe identiteti i vërtetë i telefonuesit nuk mund të verifikohet përmes këtyre adresave (p.sh. @gmail, @instagram apo platforma të tjera).

Gjatë telefonatave, personat që telefonojnë mund të komunikojnë në gjuhë të ndryshme dhe të kërkojnë të dhëna të kartës bankare ose informacione të tjera personale me pretendimin për ndalimin e disa veprime të dyshuara të kryera me kartën tuaj.

Shoqata Shqiptare e Bankave rikujton klientët se:

• Bankat në Shqipëri nuk do t’ju kërkojnë kurrë përmes telefonit të dhëna të kartës bankare, PIN-in, kodet e sigurisë apo informacione të tjera konfidenciale.

• Nëse merrni një telefonatë të dyshimtë, mos ndani asnjë informacion personal dhe ndërprisni menjëherë telefonatën.

• Verifikoni çdo komunikim duke kontaktuar bankën tuaj vetëm përmes numrave zyrtarë të publikuar nga banka.

• Raportoni menjëherë çdo rast të dyshimtë pranë bankës suaj.

Shoqata Shqiptare e Bankave dhe bankat anëtare mbeten të përkushtuara për rritjen e ndërgjegjësimit dhe mbrojtjen e klientëve nga përpjekjet për mashtrim financiar. /CNA