Me një sërë akuzash/ I vihen prangat mikut "non grata" të Erion Veliajt

23 Shkurt 2026, 09:29, Aktualitet CNA

Me një sërë akuzash/ I vihen prangat mikut "non grata"

Mëngjesin e kësaj të hëne në vendkalimin kufitar Bllacë i janë vënë prangat ish-zëvendëskryeministrit të Maqedonisë së Veriut, Artan Grubi, të shpallur "non grata" nga DASH dhe të shpallur në kërkim nga autoritetet vendase.

Momenti i prangosjes, burimi "Alsat"

Grubi është i përfshirë në një hetim që lidhet me dyshime për shpërdorim të detyrës, korrupsion dhe shkelje të procedurave të prokurimit publik, shkruajnë mediat vendase.

Sipas organeve të ndjekjes, hetimet kanë të bëjnë me vendime dhe kontrata që dyshohet se kanë shkaktuar dëme financiare të konsiderueshme në buxhetin e institucionit, që përllogariten në 500 milionë denarë apo mbi 8 milionë euro. Prokuroria pretendon se përmes procedurave të kontestuara janë favorizuar subjekte të caktuara ekonomike.

Gjykata paraprakisht kishte caktuar masë paraburgimi ndaj Grubit, ndërsa autoritetet e kishin shpallur në kërkim për shkak të mosparaqitjes para organeve të drejtësisë.

Artan Grubi u shpall "non grata" nga DASH më 10 dhjetor 2024.

Por çfarë e lidh Grubin me Erion Veliajn?

Grubi është miku i Erion Veliajt, i cili e ka pritur shpeshherë në zyrën e tij. Madje i ka dhuruar dhe Kullën e Sahatit Grubit gjatë një takimi në Bashkinë e Tiranës në vitin 2021.

Me një sërë akuzash/ I vihen prangat mikut "non grata"

Po ashtu një takim tjetër është zhvilluar në vitin 2023 mes Veliajt dhe Artan Grupit të shpallur "non grata" nga DASH.

“I lumtur që pata mundësinë të takoja mikun tim, Artan Grubi – zv/kryeministrin e parë të Maqedonisë së Veriut. Kënaqësi të bisedoja për më shumë bashkëpunim në projekte të reja”, shkruante Veliaj duke pranuar kështu miqësinë e ngushtë me Artan Grubin, i cili akuzohet për korrupsion.

Me një sërë akuzash/ I vihen prangat mikut "non grata"

Por çfarë i bashkon Veliajn dhe Grubin përveç miqësisë?

Erion Veliaj u hetua nga SPAK-u dhe iu provuan 13 akuza për 5 vepra të rënda penale, përfshirë korrupsionin, shpërdorim detyre, pastrim të produkteve të veprës penale, fshehje e pasurisë dhe futje të sendeve të paligjshme në qeli.

Artan Grubi është i akuzuar për korrupsion, shpërdorim detyre dhe abuzime me tenderë. Sipas DASH-it, ai dhe familjarët e tij u shpallën "non grata" pasi ishin të përfshirë në korrupsion.

Po ashtu edhe Veliaj ndodhet në burg për 13 akuza, ndërsa Ajola Xoxa është në masën e sigurisë arrest shtëpie me 12 akuza.

Veliaj dhe Xoxa kanë përdorur skema të ndryshme për t'u pasuruar dhe për të çuar para në xhepat e tyre dhe të familjarëve.

Pra, ajo që i bashkon, përveç miqësisë, janë akuzat për korrupsion dhe shpërdorim të detyrës./ CNA