Manastirliu: Rritje historike, paga mesatare e mësuesve bëhet 950 euro

26 Qershor 2024, 13:43, Aktualitet CNA

Manastirliu: Rritje historike, paga mesatare e mësuesve bëhet 950 euro

Ministrja e Arsimit dhe Sportit, Ogerta Manastirliu. Burimi, MAS

Qeveria miratoi sot vendimin për rritjen e pagave për mësuesit dhe punonjësit në sistemin arsimor parauniversitar.

Ministrja e Arsimit dhe Sportit, Ogerta Manastirliu, në komunikimin me median pas mbledhjes së qeverisë, e ka konsideruar këtë vendim historik për motivimin dhe mbështetjen e mësuesve dhe rritjen e cilësisë së mësimdhënies.

“Dua të ndaj me ju, por mbi të gjitha me mësuesit në sistemin tonë arsimor, një lajm vërtetë të mirë për sa i përket rritjes historike të pagave për mësuesit, e cila fillon nga 1 korriku dhe do të përfshijë 30 mijë punonjës në sistemin tonë arsimor, duke qenë kjo rritja më e madhe e pagave në këto dekada. Paga mesatare e mësuesve rritet me 18 mijë lekë të rinj/muaj apo me tri paga në vit, duke e çuar pagën mesatare të mësuesve 950 euro”, tha ministrja.

Pagat e mësuesve të arsimit të mesëm të lartë me 15 vite eksperiencë shkon 98,500 lekë. Pagat e mësuesve të arsimit të mesëm të ulët me 15 vite eksperiencë shkon 96,600 lekë. Pagat e mësuesve të arsimit të ulët 9-vjeçar me 15 vite eksperiencë shkon 95,000 lekë.

Nga kjo politikë e re pagash përfitojnë gjithashtu edhe punonjësit e shërbimit psiko-social (psikologët dhe punonjësit socialë), oficerët e sigurisë në këto insitucione, të cilët luajnë rol tepër të rëndësishëm në mirëqenien e dhe sigurinë e fëmijëve.

“Paga e një punonjësi të shërbimit psikosocial në shkolla me 15 vite eksperiencë shkon 91,000 lekë dhe paga e një oficeri sigurie shkon 80, 000 lekë në muaj”, tha Ministrja Manstirliu.

Kjo politikë pagash është gjithëpërfshirëse dhe përfitojnë gjithashtu edhe edukatorë në kopshte dhe çerdhe si dhe mësues të arsimit profesional.

Risitë në këtë skemë pagash janë: Rritja e masës së shpërblimit për mësuesit sipas kategorisë së kualifikimit, duke dyfishuar pagesën për kualifikimin për mësuesit e kualifikuar dhe mësuesit specialistë dhe duke rritur me 50% për mësuesit mjeshtër. Pagesa për vjetërsinë në punë përllogaritet mbi pagën e pozicionit për 30 vite punë në ndryshim nga aktuale ku përllogaritet mbi pagën e grupit deri në 25 vite punë. Përafrimi i pagave të mësuesve të arsimit 9-vjeçar me ata të mesëm. Shtimi i roleve të reja në shkollë si mësuesi/koordinator i cilësisë dhe orinetimit të karriesës i cili do të ndihmojë në rritjen e cilësisë në mësimdhënie dhe në kualifikimin e mësuesve./ CNA