Lorenc Vangjeli zbardh bisedën sekrete mes Berishës dhe Majkos në '98

16 Janar 2024, 12:19, Aktualitet CNA

Lorenc Vangjeli zbardh bisedën sekrete mes Berishës dhe Majkos në

Pandeli Majko, Ilir Meta, Sali Berisha

Analisti Lorenc Vangjeli ka treguar në një studio televizive bisedën sekrete që është zhvilluar në takimin e dhjetorit të vitit 1998 mes Sali Berishës dhe Pandeli Majkos.

Kujtojmë që ky takim u zhvillua kur studentët ishin futur në grevë urie dhe në atë kohë opozita e drejtuar nga Sali Berisha kërkonte dorëheqjen e kryeministrit Pandeli Majko.

Nisur nga fakti që Millosheviç po niste spastrimin etnik në Kosovë, Vangjeli thotë se Berisha u vu në dijeni për atë se çfarë po pritej të ndodhte në Kosovë, ndaj iu kërkua që të bëheshin bashkë në mbështetje të Kosovës.

Rrëfimi i Vangjelit:

Kur ndodhi ngjarja e shtatorit me vrasjen e deputetit Azem Hajdari, ajo e cila gjerësisht më pas u konsiderua grusht shteti, rrëzimi i një qeverie socialiste nga Fatos Nano, ardhja në pushtet e dyshes Majko-Meta dhe në dhjetor studentët ishin ngujuar në një grevë urie në Qytetin Studenti, ndërkohë që në javët e para, ose më saktë në javën e dytë të dhjetorit '98, kjo mund të tingëllojë si diçka që do të vijë nga filmat, kishte ardhur njoftimi në Tiranë se serbët kishin planifikuar që të kryenin operacionin e spastrimit etnik në pranverën e vitit të ardhshëm. Ajo që pasoi në atë kohë ishte largimi i studentëve nga greva e urisë me ndërhyrjen e policisë madje dhe me një truk pas 25 vjetësh këto gjëra mund të thuhen, u hap fjala se mund të kishte dhe akte terroriste dhe për të mbrojtur dhe jetën e tyre ndërhyri policia për t'i nxjerrë jashtë.

Në datën 28 dhjetor zhvillohet takimi i parë mes kryeministrit dhe zv/kryeministrit të kohës, zotit Majko dhe Ilir Meta me Sali Berishën të shoqëruar nga Genc Pollo në ambientet e një hoteli të njohur në Tiranë. Ndryshe nga sa është thënë e komentuar, unë mund t’ju citoj vetëm një frazë, zotit Berisha në cilësinë e ish-kryeministrit dhe ish-presidentit të vendit iu vu në dijeni se çfarë po pritej të ndodhte, fakti se çfarë do të duhej të përballonte Republika e Shqipërisë dhe Kosova dhe iu kërkua se për hir të asaj që pritej të ndodhte me shqiptarët që më së fundi po identifikonim një armik përballë të bëheshim bashkë. Po ju citoj vetëm një frazë: 'Dhe tani ato protestat është mirë që të mos bëhen. Shiko këtu, kupton apo jo demokracia'. Dhe atëherë përgjigjja e dy socialistëve 30-vjeçarë ishte: 'Nëse ju e bëni përsëri këtë ne do t’ju godasim'.

Dhe unë këtë ua them jo vetëm si dëshmitar. Më pas masakra e Reçakut ishte pika e zgjimit që e zgjoi perëndimin, i cili ende kishte makthet e asaj që kishte ndodhur në Bosnje. Dhe këtu ngjarjet vijuan njëra pas tjetrës për të arritur deri në konferencën e Rambujesë. Roli i shqiptarisë i atyre komandantëve të dalë nga lufta ishte i jashtëzakonshëm. Shqipëria ishte një pikë uji me një ekuilibër kaq të brishtë që bëri që ekuilibri të rëndonte nga drita, nga përparimi, nga humanizmi te pavarësia e Kosovës./CNA