Shëndetësia rëndon xhepat e shqiptarëve/ Mjeku Erion Dasho, intervistë për CNA TV

16 Janar 2024, 12:10, Aktualitet CNA

Erion Dasho

Eksperti i Shëndetit Publik, Erion Dasho, në një intervistë për CNA TV me gazetaren Fabjona Pasho, ka komentuar raportin e OBSH-së, që thekson se shqiptarët përballen me kosto të larta shëndetësore, të cilat rëndojnë drejtpërdrejt në xhepat e qytetarëve.

"Kemi një sistem shëndetësor, i cili nuk reformohet prej 10 vjetësh. Barra e shpenzimeve u lihet në kurriz qytetarëve dhe shteti nuk merr përgjegjësitë që i takojnë. Kemi një shtet, i cili nuk ka ndryshuar prej 10 vjetësh qasjen në raport me financimin, qasjen në raport me organizimin, në raport me digjitalizimin, qasjen në raport me përmirësimin e shërbimeve. Por, kemi një reformë e cila ka mbetur në vend, nuk zhvillohet dhe pasojat i pamë gjatë pandemisë. Raporti e thekson se ishte pandemia ajo që e vuri në pah këtë fenomen. Analizat e mia dhe të kolegëve të mi tregojnë se nuk është pandemia ajo që e shkaktoi këtë, por arsyet dhe rrënjët e problemit janë shumë më të thella dhe kërkojnë që të merren masa urgjente për ta përmirësuar dhe ndryshuar situatën", u shpreh Dasho.

Sipas Dashos, sistemi shëndetësor në Shqipëri ka një sërë problematikash, duke nisur nga mungesa e bluzave të bardha, e deri te mungesa e mjeteve teknologjike.

"Kemi eksodin e bluzave të bardha që e kanë lënë Shqipërinë me më pak se 1 mjek për 1 mijë banorë. Kjo është një shifër e frikshme. Kemi infrastrukturën, e cila është një infrastrukturë e amortizuar, e cila nuk u përshtatet më nevojave dhe mënyrës se si bëhet kujdesi shëndetësor sot në botë, për të vazhduar pastaj te mungesa e pajisjeve. Shqipëria vuan nga mungesa e pajisjeve bashkëkohore për ofrimin e kujdesit shëndetësor. Mungesë të medikamenteve. Në gjithë botën flitet për atë që quhet transformimi digjital i sistemeve shëndetësore, shëndetësia shqiptare është shumë larg transformimit digjital", tha ai.

Në fjalën e tij për CNA TV, Dasho ngre edhe një sërë shqetësimesh të tjera, si koncensionet abuzive të shëndetësisë, si dhe rekomandon të merren masa urgjente për t'u ardhur në ndihmë qytetarëve duke përmirësuar sistemin shëndetësor./CNA