Kushi sqaron studentët e Mjekësisë/ Çfarë ndodh nëse nuk u gjendet punë brenda një viti?

5 Korrik 2023, 13:51, Aktualitet CNA

Kushi sqaron studentët e Mjekësisë/ Çfarë ndodh

Ministrja e Arsimit, Evis Kushi, ka shpjeguar detajet mbi vendimin e marrë sot në mbledhjen e qeverisë në lidhje me mbajtjen peng të diplomave të studentëve të Mjekësisë për 5 vjet në total.

Kushi u shpreh se studentët që do të nisin studimet në Universtitetin e Mjekësisë do duhet të nënshkruajnë një marrëveshje ku thuhet se kanë kusht punësimin me detyrim për 5 vite, por kjo shifër ndryshon për studentët aktualë.

Ministrja sqaroi se studentët e Mjekësisë nga viti i parë deri në vitin e katërt do duhet të punojnë në Shqipëri për 3 vjet ndërsa ata që janë në vitin e pestë dhe të gjashtë do duhet të punojnë 2 vjet me detyrim për të tërhequr diplomën ndryshe do paguajnë koston reale të studimeve të tyre në Shqipëri.

Kushi nënvizon se është parashikuar që nëse për një vit studentëve nuk u gjendet punë në institucionet përkatëse në Shqipëri, ata mund të tërheqin diplomën.

“Kandidatët për studentë, para regjistrimit në universitet do të nënshkruajnë një marrëveshje me Universitetin e Mjekësisë, Ministrinë e Shëndetësinë dhe atë Arsimit për t’u angazhuar 5 vite në institucionet në Shqipëri. Për studentët që janë këtë vit, do të nënshkruhet një marrëveshje ku nënshkruajnë që studentët nga viti i parë deri tek i katërti duhet të punojnë 3 vite, ndërsa nga viti i katërt deri në gjashtë 2 vite.

Pra ky është detyrimi që kanë. Kandidatët nuk kanë mundësi zgjedhjeje, duhet të nënshkruajnë këtë marrëveshje, studentët e tjerë mund të zgjedhin mes dy alternativave. Duhet të japin kontribut për vendin sepse duhen plotësuar nevojat për mjekë.

Nëse nuk plotësohet për një vit detyrimi për t’u angazhuar në institucione ata mund të tërheqin diplomën. Kjo nuk ndodh, por megjithatë është pjesë e marrëveshjes. Dua të theksoj se ky projektligj do të prezantohet në Kuvend me procedurë të përshpejtuar sepse në gusht ata maturantët që duan të studiojnë mjekësi duhet të zhvillojnë provimin përkatës.”- tha Kushi./ CNA