Krisma pati, Mark Frroku s'i dëgjoi/ Ç'ndodhi në Kepin e Rodonit gjatë sherrit për murin

30 Tetor 2023, 13:43, Aktualitet CNA

Krisma pati, Mark Frroku s'i dëgjoi/ Ç'ndodhi në

Ish-deputeti Mark Frroku, është arrestuar nga policia e Durrësit pas një konflikti për një pronë në Kepin e Rodonit. Për sherrin e ndodhur të dielën në prangat e policisë kanë rënë edhe 7 persona dhe 1 tjetër është nën hetim.

Ndërkohë në kërkim është Besnik Toma, i cili sipas policisë ka qëlluar me armë gjatë sherrit. Ky i fundit është një i afërm i Mark Frrokut.

Konflikti ka nisur për rrethimin e tokës me sipërfaqe 5 dynym e 400 m2 tokë në këtë zonë. Përfaqësuesit e kishës katolike pretendojnë se kanë certifikatë pronësie. Të njëjtin dokument pretendon se ka edhe familja Kaculi, një certifikatë pronësie për të njëjtën pronë. Pikërisht për këtë arsye këta të fundit nuk kanë lejuar që të kryhej rrethimi, veprim që është kundështuar nga grupi i ish-deputetit.

Ky nuk është konflikti i parë që ka ndodhur në këtë zonë, por është një rast i përsëritur dhe deri më tani nuk është parë asnjë ndërhyrje nga shteti për të zgjidhur këtë konflikt.

Krsima pati, Mark Frroku nuk i "dëgjoi"

Detaji i të shtënave me armë gjatë sherrit është konfirmuar edhe nga Policia e Durrësit, por ish-deputeti, edhe pse ishte në vendngjarje, nuk ka parë ndonjë person të gjuante dhe as të dëgjonte krismat. Ai ka mbajtur gojën mbyllur para hetuesve dhe nuk ka preferuar të flasë për detajet.

"Arrestohen në flagrancë shtetasit: B. K., E. R., O. R. dhe Y. R., për veprat penale 'Plagosja e rëndë me dashje' dhe 'Vetëgjyqësia'; M. F., A. L., P. D. dhe M. L., për veprat penale 'Kanosja', 'Moskallzimi i krimit', 'Veprime që pengojnë zbulimin e së vërtetës' dhe 'Prishja e rendit dhe qetësisë publike'. Gjithashtu, nisi procedimi në gjendje të lirë për shtetasin N. S., për veprën penale 'Moskallzimi i krimit', si dhe vijon puna për kapjen e shtetasit B. T. Ditën e djeshme, shtetasit B. K., E. R., O. R., Y. R., banorë të fshatit Shetaj, janë konfliktuar me sende të forta me shtetasit N. S., M. F., A. L., P. D. dhe M. L., përfaqësues të kishës françeskane, të cilët po bënin rrethimin e një sipërfaqeje toke në zonë, për të cilën kanë certifikatë pronësie. Si pasojë e konfliktit, shtetasit e përfshirë në konflikt kanë pësuar dëmtime fizike. Policia gjeti në vendin e ngjarjes një gëzhojë arme zjarri. Nga veprimet hetimore rezultoi se shtetasi që ka qëlluar me armë zjarri, gjatë konfliktit, është shtetasi B. T", thuhej në njoftimin e policisë.

Pavarësisht se blutë kanë administruar pamje filmike ku dokumentojnë veprimet e dhunës, Frroku u ka thënë hetuesve se nuk dinte asgjë, nuk kishte ndodhur asgjë dhe nuk ishte konfliktuar askush. Pikërisht për këtë arsye ai akuzohet nga autoritetet edhe për moskallëzim të krimit.

“Isha në zonë sepse jam pajtuar nga përfaqësuesit e kishës si ndërtues i murit. Nuk e di se çfarë ka ndodhur dhe se është qëlluar me armë”, është shprehur Frroku ndër të tjera.

Ndërsa, praninë e tij në zonë, Frroku e ka justifikuar si ndërtues i murit dhe se ishte pajtuar nga përfaqësuesit e kishës./CNA