Gara fiktive për tenderin mbi 350 mijë euro/ KLSH kap në shkelje ministren Margariti, asnjë kriter për kompanitë

30 Tetor 2023, 10:37, Aktualitet CNA

Gara fiktive për tenderin mbi 350 mijë euro/ KLSH kap në shkelje

Kontrolli i Lartë i Shtetit gjatë një auditimi të bërë mbi procedurën e prokurimit “Parku i Artit, rivitalizimi dhe rikualifikimi i territorit të ish Kinostudios "Shqipëria e Re", Tiranë, Faza II”, ka kapur në shkelje Ministrinë e Kulturës, përgjegjëse e drejtpërdrejtë Elva Margariti.

Në raporton e KLSH-së theksohet se në këtë tender, nuk janë argumentuar kriteret kualifikuese dhe një pjesë e tyre nuk janë në përpjesëtim me aftësinë zbatuese, natyrën dhe vlerën e kontratës.

"Nga auditimi në dokumentacionit fizik dhe elektronik për procedurën eprokurimit me objekt “Parku i Artit, rivitalizimi dhe rikualifikimi i territorit të ish Kinostudios "Shqipëria e Re", Tiranë, Faza II”, viti 2022 me fond limit 155,008,461 lekë pa TVSH, konstatohet se në tenderin e zhvilluar më datë 21.06.2022 (anuluar) dhe në datën 15.08.2022, nuk janë argumentuar kriteret kualifikuese dhe një pjesë e tyre nuk janë në përpjesëtim me aftësinë zbatuese, natyrën dhe vlerën e kontratës", thuhet në raport.

Një shkelje tjerër, sipas KLSH-së është se gjatë procedurës së tenderimit është kërkuar që operatori ekonomik për realizimin e punimeve duhet të ketë një arkitekt peizazhi dhe një 1 inxhinier pyjesh, të cilat nuk janë të nevojshme, pasi për të realizuar këtë projekt është i nevojshëm vetëm inxhinieri zbatues.

"Kriteret Kualifikuese janë konstatuar në kundërshtim me VKM nr. 425 datë 27.05.2020 “Për procedurat e përzgjedhjes së subjekteve të pajisura me licence për projektim, zbatim, mbikëqyrje dhe kolaudim në pasuritë kulturore, për kryerjen e Investimeve me fonde publike në pasuritë kulturore” pika 17. Në pikën 3.5 të DST kërkohet që Operatori Ekonomik për realizimin e punimeve duhet të ketë 1 Arkitekt Peizazhi dhe 1 Inxhinier Pyjesh. Kjo kërkesë nuk është në përputhje me natyrën e kontratës, pasi në hapësirën ku do të zhvillohet projekti nuk është e nevojshme një arkitekt peizazhi, për shkak se projekti është i realizuar nga projektuesi dhe duhet vetëm të zbatohet nga ofertuesi me anë të inxhinierëve zbatues që ai disponon. Për sa i përket kërkesës për një inxhinier pyjesh nuk është e nevojshme dhe në përputhje me natyrën e prokurimit, për shkak se në ambientet e jashtme të Ministrisë së Kulturës nuk ka pyll, por thjesht një hapësirë e gjelbër. Në pikën 3.7. kërkohet që Operatori ekonomik duhet të paraqesë licencë të vlefshme (Licence, Kodi III.7.A për “Shërbime ekspertize dhe/ose profesionale lidhur me pyjet dhe/ose kullotat”), e cila është në kundërshtim me pikën 17 të VKM nr. 425 datë 27.05.2020 për shkak se në hapësirën e gjelbër të Ministrisë së Kulturës, nuk ka as pyje e as kullota që ky kriter të ishte i domosdoshëm për realizimin e procedurës së prokurimit. (Më hollësisht trajtuar faqet nr. 9-26 të Raportit Përfundimtar të Auditimit)", thuhet në raportin e KLSH.

Ndërkohë një shkelje tjetër sipas KLSH-së, është se për tenderin "Rivitalizimi dhe përmirësimi i zonës së gjelbër – Parku i Artit, Ministria e Kulturës" me vlerën 356,049 Euro me TVSH, kompania fituese e shpallur G.L, ka dhënë një ofertë ekonomike të pasaktë duke mos vendosur çmimet në të gjitha zërat e preventivit.

"Nga auditimi i dokumentacioneve të vëna në dispozicion të operatorit të shpallur ftues G.L
konstatohet: Oferta ekonomike rezulton e pasaktë duke mos vendosur çmimet në të gjitha zërat e preventivit. Rreth 1/3 e zërave të preventivit u mungon oferta e çmimeve përkatëse. Vlera në total e çmimeve
të ofertuar në 2/3, rezulton sa vlera e ofertës që është shpallur fitues. Oferta ka rezultuar me gabime dhe të paplotësuara me çmime por nuk është s’kualifikuar nga KVO, për shkak të kontratës çmim total. Nga KVO nuk janë kërkuar sqarime ose argumentime për këtë fakt të cilat më pas kanë sjellë veprime në kundërshtim me kontratën gjatë ekzekutimit të punimeve.", thuhet në njoftim.

Shkelja e radhës sipas KLSH-së është se kompania fituese G.L, ka kërkuar edhe shtim të vlerës së kontratës pa dhënë asnjë argument.

"Ministria e Kulturës, të vlerësojnë e të analizojnë shtesën e kontratës në vlerën 51,480 Euro me TVSH e cila rezulton e pa argumentuar, ku të përcaktohen shkaqet, arsyet dhe përgjegjësitë ligjore e financiare dhe të ndiqen të gjitha rrugët ligjore për arkëtimin e vlerës nga sipërmarrësi i punimeve “G.L.” sh.p.k", thuhet në njoftimin e KLSH-së./CNA