Kontakti i Berishës me Prokurorët, Gjokutaj zbulon çfarë ndodhi brenda SPAK-ut

13 Shtator 2024, 07:53, Aktualitet CNA

Kontakti i Berishës me Prokurorët, Gjokutaj zbulon çfarë

Avokati i ish-kryeministrit Sali Berisha, Genc Gjokutaj, ka zbuluar në emisionin ‘Now me Erla Mëhillin’ në "Euronews Albania" se çfarë ndodhi ditën e djeshme brenda SPAK-ut, ku i pranishëm ishte edhe vetë kryedemokrati.

Gjokutaj tha se prokurorët e çështjes i kishin dorëzuar palës mbrojtëse një kopje të vendimit të tyre të komunikimit të akuzës, që sipas tij ishte një material prej 500 faqesh.

Ai tha gjithashtu se SPAK-u nuk kishte vendosur në dispozicion të tyre disa akte, për të cilat sipas tij, e kishin pranuar edhe vetë një fakt të tillë.

Sipas Gjokutajt, kontakti i Berishës me prokurorët ishte i shkurtër dhe krejt indiferent, pasi sipas tij, edhe vetë seanca ishte e shkurtër.

“Ne mbërritëm në SPAK, ata kishin bërë gati një kopje të vendimit të tyre të komunikimit të akuzës. Ishte një material prej 500 faqesh, i cili nuk mund të lexohej e komunikohej aty. Por prokurorët, Kraja e Millonaj, e vunë në dispozicion dhe të drejtat procedurale në proces, të cilat ne i morëm, firmosëm që morëm dijeni. Këtu mbaroi e gjithë situata.

U mbajt një procesverbal tepër i shkurtër, sepse ne nuk mund të jepnim shpjegime pa u njohur me përmbajtjen e vendimit dhe me një pjesë të akteve të cilat nuk janë vënë ende në dispozicion nga SPAK-u. Ata e pranuan edhe vetë që nuk na i kanë vënë në dispozicion disa akte. Kështu që ne shprehëm vullnetin, sigurisht zoti Berisha, i cili nuk kërkonte kohë, por kërkuam kohë ne mbrojtësit që të njiheshim, sepse Berisha është krejt i qartë në lidhje me çështjen, por nga pikëpamja procedurale i është obligimi ynë që të bëjmë ato kundërshtitë dhe të japim shpjegimet lidhur me të.

Këtu mbaroi kontakti i Berishës me prokurorët, ishte krejt indiferent, sepse edhe seanca ishte e shkurtër. Ne presim të na jepet ajo pjesë e akteve, sepse unë mendoj se një vendim i tillë nuk mund të komunikohet nëse ne nuk na janë vënë në dispozicion të gjitha aktet”, tha Gjokutaj. /CNA