Emërimet në SPAK dhe GJKKO/ Vendos Gjykata Kushtetuese

23 Janar 2025, 17:31, Aktualitet CNA

Magjistratët të cilët kanë kaluar me sukses vetingun në dy shkallët e tij përfshirë KPK dhe KPA, do të kuptojnë në vendimin e Gjykatës Kushtetuese në mars nëse do të mund të jenë pjesë e SPAK si prokurorë dhe Gjykatës së Posaçme si gjyqtarë. Më herët, komisioni i vlersimit të figurave i ka përjashtuar ata për papërshtatshmëri edhe pse janë çertifikuar me veting.

Sipas asaj që njofton “weblajme.com”, në mars të këtij viti pritet që Gjykata Kushtetuese të vendosë nëse pika 5 e nenit 6 e ligjit për organizimin dhe funksionimin e institucioneve që luftojnë krimin e organizuar dhe korrupsionin është apo jo kushtetuese.

Neni 6

Procedura e verifikimit të kushteve të sigurisë përpara emërimit në detyrë

Pika 5

5. Gjykatat e posaçme kundër korrupsionit dhe krimit të organizuar, Prokuroria e Posaçme dhe Byroja Kombëtare e Hetimit krijojnë Komisionin e Posaçëm të Verifikimit të Pasurisë dhe Figurës së Kandidatëve për të bërë verifikimin e kushteve të sigurisë para caktimit në detyrë ose emërimit, të përbërë nga:

a) dy prokurorë të Prokurorisë së Posaçme, të zgjedhur me short. Procesi i përzgjedhjes me short monitorohet nga Avokati i Popullit;

b) një gjyqtar të gjykatave të posaçme kundër korrupsionit dhe krimit të organizuar, i zgjedhur me short. Procesi i përzgjedhjes me short monitorohet nga Avokati i Popullit;

c) një punonjës i seksionit të hetimit financiar pranë Prokurorisë së Posaçme, i caktuar nga Drejtuesi i Prokurorisë së Posaçme;

ç) një hetues i Byrosë Kombëtare të Hetimit, i caktuar nga Drejtori i Byrosë Kombëtare të Hetimit.

Dhe, në rast se ky nen rrëzohet atëherë magjistratët do të kishin të drejtë për t’u emëruar në SPAK dhe GJKKO ndërsa në rast të lënies në fuqi atëherë ata do të konsiderohen të përjashtuar edhe pse kanë marrë pëlqimin e KLP-së apo KLGJ-së.

Kjo seancë do të mbahet në 27 Mars 2025 ora 10:00 mbi bazë dokumentash, ndërsa si palë të interesuara janë ftuar qeveria Këshilli i Ministrave dhe Parlamenti në rolin e propozuesit dhe ligjvënësit. /CNA