Piku i virozave të stinës/ Në Shkodër mbi dy mijë raste

23 Janar 2025, 15:07, Aktualitet CNA

Shkodra duket se është në pikun e virozave të stinës teksa numri i atyre që janë paraqitur në qendrat shëndetësore në muajin e fundit, në total ka arritur në dy mijë ndërkohë që nga ana tjetër, vetëm në javën e fundit janë paraqitur 500 raste.

Shefja e epidemiologjisë në Njësinë Vendore të Kujdesit Shëndetësor në Shkodër, Dhurata Hysa, shprehet se shpreson që në ditët e ardhshme të ketë një rënie të kurbës epidemiologjike ndërsa u bëri apel qytetarëve që t’u drejtohen qendrave shëndetësore për të marrë ndihmën e nevojshme.

“Situata epidemiologjike në rrethin e Shkodrës paraqitet mjaft dinamike, kjo për vetë faktin se numri i rasteve të të infektuarve vazhdon që të jetë prezent. Mund të them se kurba epidemiologjike nuk po ka një rritje të mëtejshme, pra jemi në pikun e sezonit të virozave.

Kurba epidemiologjike për momentin është e qëndrueshme, por të shpresojmë që në ditët në vazhdim të kemi një zbritje të rasteve. Qytetarët vazhdojnë që t’u drejtohen qendrave shëndetësore për të marrë shërbimin e duhur.

Kemi edhe raste të formave klinike serioze që po i drejtohen spitalit rajonal të Shkodrës, ndërsa ka edhe shtrime. Aktualisht jemi në pikun e sezonit të virusit, pra kurba është e qëndrueshme dhe nuk është se kemi zbritje.

Presim që të kemi zbritje të kurbës epidemiologjike. Muajin e fundit janë mbi 2 mijë raste ndërsa java e fundit paraqet rreth 500 raste me numrin e të infektuarve dhe janë të ngjashme me vitet e kaluara”.

Këtë vit rastet që paraqiten kanë një diagnozë më serioze në shumë raste çka do të thotë se vijnë në një gjendje shëndetësore më të agravuar si shkak i gripit.

“Numri i rasteve është i ngjashëm me vitin e kaluar, por këtë radhë rastet që paraqiten kanë një diagnozë më serioze krahasuar me vitet e kaluara. Kjo sepse gripi zakonisht zgjat 5-7 ditë dhe kjo jep një temperaturë shumë të lartë mbi 38.5 gradë dhe ka shumë raste që kanë komplikacione të rënda si bronkit, bronkolpomoni dhe të gjitha vijnë pas infeksionit respirator të sipërm.

Janë raste ku qytetarët i drejtohen mjekut të familjes dhe po ashtu edhe spitaleve rajonale. Sa u përket këshillave them se qytetarët janë të mirinformuar lidhur me monitorimin e gjendjes së tyre shëndetësore për vetë faktin se virozat janë jo vetëm të përvitshme, por edhe në çdo sezon dhe në dimër janë më agresive dhe në një numër më të lartë.

Duhet të jenë të kujdesshëm që të mos jenë pjesë e grumbullimeve të ndryshme, një kujdes me higjienën dhe e rëndësishme është ushqyerja. Duhet sa më shumë lëngje, supë, perime, fruta dhe po ashtu çajra bimorë.

Pra ushqyerja të jetë mjaft e mirë në këtë sezon dimri. Mund të përdoret edhe ndonjë maskë kur jemi të prekur nga gripi në mënyrë që të mbrojmë familjet dhe në ditët e para të qëndrojmë në shtëpi dhe të marrim shërbimin e duhur në mënyrë ambulatore. E rëndësishme është edhe ajrosja e mjedisit të brendshëm ku qëndrojmë”. /CNA