Dashuria Xhafaj - Veliaj si histori korrupsioni

25 Shtator 2024, 22:15, Aktualitet CNA

Dashuria Xhafaj - Veliaj si histori korrupsioni

Fatmir Xhafaj dhe Erion Veliaj

Emisioni investigativ ‘Plug’ ka denoncuar se si prona shtetërore u grabit me firmë të Erjon Veliaj dhe Fatmir Xhafajt, në një operacion të dyshuar korruptiv. Me dokumente, u faktua se si Erjon Veliaj i dha Armand Lilos leje për ndërtimin e kompleksit ‘Square 21’ mbi truall dhe godina shtetërore, dhe më pas me një angazhim personal të tij dhe Fatmir Xhafajt, u krye dhe kopsitja e dokumenteve. Kjo aferë i ka shkaktuar buxhetit të shtetit një dëm prej miliona euro, ndërkohë që dosja edhe pse është në SPAK, prokuroria nuk e heton.

Ristartoi këtë të mërkurrë në SYRI TV, emisioni investigativ Plug, duke denoncuar një tjetër skandal korruptiv e pastrim parash, ku rezultojnë të përfshirë kryebashkiaku i Tiranës Erjon Veliaj dhe ish-ministri i Brendshëm Fatmir Xhafaj. I gjithë operacioni duket të jetë i ndërtuar mbi kompanitë e kunatit të Xhafës, që pas ardhjes në pushtet të socialistëve ka nisur ngritjen e një perandorie financiare.

Në puntatën e parë, u publikuan dokumente, se si Kompleksi ‘Square 21’, në Rrugën e Kavajës është ndërtuar mbi grabitjen e pronës shtetërore dhe falsifikimit të dokumenteve.

Zanafilla e këtij projekti daton më 21 shtator 2017, me miratimin e lejes së ndërtimit nga Erjon Veliaj, duke i hapur rrugën uzurpimit të trojeve shtetërore, godinave, dhe lulishtes publike.

Ndërsa Armand Lilo ndërtonte mbi pronat shtetërore, Erjon Veliaj dhe Fatmir Xhafaj u angazhuan personalisht për të ndryshuar dokumentacionin e nevojshëm, që t’i ligjëronin edhe pronën që do të sillte një dëm miliona euro ndaj buxhetit të shtetit.

Fillimisht nga Ndërmarrja Industriale nr. 1 që kishte administrimin e godinave ekzistuese, u kërkua shembja e tyre, në një kohë që ky akt ishte kryer nga Armand Lilo që prej marrjes së lejes për ndërtim nga Erjon Veliaj. Kjo i hapi rrugë procedurës nga Erjon Veliaj dhe Fatmir Xhafaj, që vunë në lëvizje institucionet respektive për dokumentacionin e nevojshëm.

Nga njëra anë Fatmir Xhafaj, i propozon Këshillit të Ministrave ndryshimin e pronësisë së këtyre trojeve e godinave, që nga Ministria e Zhvillimit Ekonomik të kaloni për llogari të Bashkisë së Tiranës, dhe kjo aferë u firmos nga kryeministri Edi Rama me VKM të datës 18 Maj 2018.

Tashmë që bashkia ishte bërë pronare e truallit dhe godinave, të shembura ndërkohë nga Lilo, iu hap rrugë Erjon Veliajt që të avaconte me procedurën shkresore. Veliaj angazhoi një grup të posaçëm pune dhe Këshillin Bashkiak që pronën t’ja kalonin Armand Lilos nëpërmjet një marrëveshje që Bashkia e Tiranës do të nënshkruante me kompaninë ‘Arlis’, një marrëveshje që do t’i sillte pasoja të rënda pronës dhe pasurisë shtetërore.

Pas disa vendimeve të njëpasnjëshme, Erjon Veliaj do të lidhte marrëveshje me Armand Lilon, ku do t’i kalonte atij të gjitha pronat dhe godinat shtetërore. Nga kjo marrëveshje Armand Lilos ju ligjërua grabitja e të paktën 6400 m2 truall dhe afro 6 mijë m2 ndërtesa shtetërore, në Rrugën e Kavajës, një prej zonave më të preferuara në kryeqytet. Sipas aktmarrëveshjes, së firmosur mes Erjon Veliajt dhe Ferzilet Hajdërit, përfaqësuese e Armand Lilos, bashkia do t’i jepte të gjithë hapsirën Armand Lilos, për të përfituar vetëm 4400 m2 godinë, sipërfaqe kjo disa herë më e vogël edhe se ajo e godinave që Arlis do të shembte, e për më tepër, duke mos respektuar as ligjin por as rregullat për përfitimet në rastet e marrëveshjeve të tilla. E gjithë procedura shkresore, ndodhte në një kohë, kur Armand Lilo, sipas lejes së miratuar kohë më parë nga Erjon Veliaj, kishte kryer pjesën më të madhe të ndërtimit mbi pronën shtetërore, e madje u favorizua edhe me falje taksash, çështje e cila tashmë ka përfunduar në SPAK./ Syri