Premton bosi i Lamborghini-t: Do t'i sjell fëmijët e mi në Shqipëri

6 Prill 2024, 11:20, Aktualitet CNA

Premton bosi i Lamborghini-t: Do t'i sjell fëmijët e mi në

Tonino Lamborghini, trashëgimtari i Ferruco Lamborghini-t, themeluesi i perandorisë industriale në fushën e mekanikës dhe automobilave luksozë, ka vizituar Tiranën.

Në podcastin me kryeministrin Edi Rama ai është shprehur se ky qytet i ka pëlqyer shumë, ndryshe nga çfarë kshte dëgjuar më herët për Shqipërinë.

Vendin tonë, ai e përshkruan me mundësi të mëdha për turizmin. Në fjalën e tij ai dha premtimin se do të sjellë fëmijët e tij në Shqipëri për të vizituar vendin tonë.

Biseda me kryeministrin Edi Rama:

Kryeministri Edi Rama: Siç e thashë, Shqipëria nuk është Tirana, Tirana nuk është Shqipëria në kuptimin që është kryeqyteti dhe është pak si vitrina e këtij transformimi le të themi. Pas saj ka vende më pak të zhvilluara, por ka...

Tonino Lamborghini: ...mundësi të mëdha për turizmin.

Kryeministri Edi Rama: Ka edhe zona fantastike me natyrën, detin, malet. E them gjithmonë, mendoj se kur Zoti ka krijuar Shqipërinë, ka qenë e diel, ditë pushimi, ka marrë gjithë kohën për të hedhur në 28 mijë kilometra katrorë, në një telajo të vogël, gjithçka: lumenj, male, kodra, dy dete dhe pastaj liqene nga jugu në veri, nga lindja në perëndim, pastaj vende të tjera në brendësi që janë mbresëlënëse. Ka kaq shumë për të bërë në Shqipëri, që, në disa aspekte, është pak si Italia e gjyshërve tuaj, me mangësitë, po edhe të mirat. Më vjen mirë që përshtypja e parë ka qenë...

Tonino Lamborghini: Më se pozitive.

Kryeministri Edi Rama: U them gjithnjë miqve dhe atyre që takoj jashtë se Shqipëria është një vend ku “nuk duhet të vijnë kurrë, sepse është një vend i rrezikshëm, vend i zymtë, vend i korruptuar, vend i varfër”...

Tonino Lamborghini: Po nuk është e vërtetë, nuk është e vërtetë.

Kryeministri Edi Rama: Po, po, por kjo është stigma që ekzistonte.

Tonino Lamborghini: Po, për fat të keq.

Kryeministri Edi Rama: U them, nuk duhet të vini, se nuk i dihet ç’ju ndodh, por, po erdhët, do kërkoni gjithnjë të ktheheni.

Tonino Lamborghini: Nuk e mohoj që, nëse kjo gjë bëhet, duhet të kem se s’bën një apartament për vete dhe për fëmijët, patjetër. Unë nuk jam më shumë i ri, por vazhdoj të udhëtoj shumë e, pastaj, kam shumë fëmijë. Pse të mos i njoh me një tokë që është ende për t’u eksploruar? Është e shëmtuar ta thuash kështu “ende për t’u eksploruar”, po për hir të Zotit.../CNA