Bllokohet Gryka e Vilunit/ Peshkatarët dhe ekspertët mjedisorë në alarm

24 Maj 2025, 13:51, Aktualitet CNA

Bllokohet Gryka e Vilunit/ Peshkatarët dhe ekspertët mjedisorë

Prej afro 3 vitesh, Gryka e Vilunit në plazhin e Velipojës është bllokuar nga mospastrimi i rërës. Ky bllokim dëmton ndjeshëm lagunën e Vilunit për shkak se peshqit nuk qarkullojnë, si dhe pengon peshkatarët që të dalin në det me varkat e tyre. Nga ana tjetër rrezikon edhe përmbytje për banesat afër lagunës….

“Bllokimi i Grykës së Vilunit ka 3-4 vite që është në këtë gjendje, e bllokuar. Aty ku ne si peshkatarë duhet që të dalim me varka është krejt cekët si shkak i bllokimit dhe është e pamundur për ne që të dalim për të gjuajtur peshk si zakonisht. Sa vijnë dallgët kthen rërën mbrapsht dhe kështu Gryka e Vilunit bllokohet. Kjo është problem për ne se mbajmë familjet përmes gjuetisë së peshkut. Jemi munduar që ta hapim vetë me lopata, por e mban vetëm 2 dy ditë dhe bllokohet sërish.Është shqetësuese për ne sepse nuk mund të gjuajmë peshkun dhe mbesim pa marrë lekët e familjes. Nuk kemi të ardhura të tjera. Para dy ditësh kam kaluar në këmbë këtu ku bashkohet laguna me ujin e detit. Është shumë cekët dhe kjo është problem për ne. Bën dëm të madh sepse sapo të bie shi ne rrezikojmë që të përmbytemi. Pastaj përveç kësaj është edhe problem se nuk mund të peshkojmë sepse është e bllokuar”.

Për ekspertin e mjedisit, Ervis Krymbi, bllokimi i Grykës së Vilunit në plazhin e Velipojës është një problem i hershëm që dëmton ekosistemin dhe jetesën e peshkatarëve si shkak i mosqarkullimit të ujërave atje…

“Është një problematikë e hershme, e përsëritur edhe më përpara si shkak i bllokimit dhe për rrjedhojë mosqarkullimit të ujërave. Është shumë e rëndësishme të dihet se lagunat janë amortizatorët e qarkullimit të ujërave. Me biodiversitetin e gjerë që ka si zonë, ekosistemin e madh normalisht që mosqarkullimi i ujërave për këtë zonë sjell probleme të mëdha. Përveç ekosistemit është problem edhe për jetesën e banorëve, sidomos të atyre që merren me çështjet e peshkimit”, ka deklaruar eksperti i mjedisit.

Sipas peshkatarëve dhe ekspertit të mjedisit e vetmja mënyrë për ta pastruar Grykën e Vilunit është përmes një anijeje të posaçme dragë që përdoret për thellimin në ujëra…

“Grykat në përgjithësi vetëm me dragë pastrohen sepse duhet që të hiqet materiali i rërës dhe të tretet shumë larg në det. Duhet që të thellohet sepse përndryshe e depoziton prapë materialin e rërës aty dhe kështu bllokohet. Një ndërhyrje me dragë do të kishte qenë shumë e nevojshme në grykëderdhjen e Vilunit. Kjo do të ishte një thirrje edhe për autoritetet që të kenë parasysh ndërhyrjen që duhet bërë në këtë pjesë kaq delikate këtu në lagunën e Vilunit” është shprehur Ergys Krymbi.

Afro 6 muaj më parë Drejtoria Rajonale e Bordit të Kullimit në Lezhë e pastroi Grykën e Vilunit përmes ekskavatorëve, por ajo ndërhyrje nuk rezultoi efeciente duke u bllokuar sërish pas pak kohësh dhe duke sjellë probleme për peshkatarët./ CNA