Asnjë fjalë për Ervis Martinajn/ Zhbëhen ultimatumet, Rrumbullaku vijon bisedat e tavolinave

30 Shtator 2022, 10:47, Aktualitet CNA

Asnjë fjalë për Ervis Martinajn/ Zhbëhen ultimatumet,

Kur mbarë opinioni publik pret zbardhjen e rastit të Ervis Martinajt, drejtori i ri i policisë, që u prezantua me superlativa nga kryeministri Edi Rama dhe Ministri i Brendshëm Bledi Çuçi, po zhvillon një tur takimesh me diplomatët e akredituar në vendin tonë.

U lanë afate për të hedhur dritë mbi zhdukjen e Ervis Martinajt, u fol për prova, por ende asgjë përveçse materialet që policia dhe Prokuroria kanë hedhur në media në formë burimesh.

Në këto rrethana, çdo ditë drejtori i policisë, po zhvillon biseda tryeze.

Sot ai është takuar me ambasadorin e Holandës, Reinout Vos.

Në fokus të takimit, siç njofton policia ishin evidentimi i bashkëpunimit shumë të mirë mes palëve dhe shprehja e gatishmërisë për ta vazhduar dhe forcuar më shumë bashkëpunimin, në të ardhmen, kryesisht në fushën e krimit të organizuar, me fokus trafikimin e lëndëve narkotike, migracionin e paligjshëm dhe luftën e përbashkët ndaj grupeve kriminale.

Asnjë fjalë për Ervis Martinajn/ Zhbëhen ultimatumet,

“Drejtori i Përgjithshëm e njohu ambasadorin me prioritetet e tij për reformimin strukturor, ligjor dhe funksional të policisë e shtetit, si dhe me vendosmërinë e tij për t’i dhënë fund mentalitetit të pandëshkueshmërisë, duke nxjerrë nga radhët e policisë ata punonjës, të cilët me veprimet e tyre cenojnë imazhin e policisë dhe ulin besimin e qytetarëve të policia e shtetit.

Drejtori i përgjithshëm e siguroi ambasadorin se bashkëpunimi do të vijojë duke intensifikuar shkëmbimin e informacioneve mes palëve, kryesisht nëpërmjet oficerëve të kontaktit, shtimit të skuadrave të përbashkëta hetimore për realizimin e më shumë operacioneve në luftën kundër krimit të organizuar, terrorizmit dhe krimit kibernetik.

Ambasadori Reinout Vos e uroi drejtorin për misionin e vështirë që ka dhe i shprehu gatishmërinë atij, për ta ndihmuar policinë e shtetit, me donacione të ndryshme, me pajisje për sulmin kibernetik dhe për çdo nevojë që policia e shtetit do ketë në fusha të tjera.

Ambasadori Vos i shprehu drejtorit të përgjithshëm mbështetjen e ambasadës dhe të policisë holandeze, duke theksuar se besimi reciprok dhe bashkëpunimi me profesionalizëm mes paleve janë domosdoshmëri për të arritur rezultatet e dëshiruara në luftën ndaj gupeve kriminale që veprojnë në Shqipëri, Holandë e më gjerë”, thuhet në njoftimin e policisë./CNA.al