web counter
LEXO PA REKLAMA!

SHKARKO APP

App Store
Google Play

E fundit!

x

Apeli i Posaçëm urdhëron SPAK-un/ Të hetohet hoteli në Durrës, punonjësja përmend Veliajn aksioner

3 Korrik 2024, 23:01, Aktualitet CNA
Apeli i Posaçëm urdhëron SPAK-un/ Të hetohet hoteli
Fotomontazh - Hoteli në Durrës, Redi Molla dhe Erion Veliaj

Apeli i Posaçëm rëndoi akuzat për drejtorët e Erion Veliajt të akuzuar për dosjen “5D”, duke i cilësuar si grup të strukturuar kriminal.

Përveç këtij vendimi, Apeli i Posaçëm ka dhënë edhe një urdhër për SPAK-un.

Gjyqtari Florian Kalaja ka kërkuar të bëhet një hetim i plotë për çështjen e hotelit në Durrës, që përmendet në bisedat e shtetases Jona Bejko.

Në vendimin e zbardhur të Apelit të Posaçëm thuhet se SPAK duhet të marrë në pyetje shtetasen Jona Bejko, për të mësuar dijeninë që ka mbi të dhënat apo informacionet që di rreth këtij hoteli.

Apeli i Posaçëm urdhëron SPAK-un/ Të hetohet hoteli
SPAK, burimi LSA

“Gjykata vlerëson se është e nevojshme dhe e domosdoshme për ecurinë e mbarëvajtjen e hetimit që Jona Bejko të pyetet dhe të hetohet lidhur me të dhënat e përmbajtjes së këtij komunikimi apo të kësaj dijenie të saj, duke e verifikuar gjithashtu edhe ekzistencën e këtij projekti në Durrës, natyrën e investimit të tij dhe kontributin apo përfshirjen e subjektit tregtar 5D KONSTRUKSION në këtë investim dhe gjithashtu edhe identifikimin e plotë të subjekteve që hasen apo që kanë interesa nga kjo shoqëri tregtare, qofshin ato persona fizikë, zyrtarë apo jo dhe qoftë edhe persona juridikë të tjerë të lidhur me të”, theksohet në vendim.

Më herët CNA ka zbardhur dosjen e plotë të hetimeve ndaj kompanisë “5D Konstruksion” ku zbardhen në detaje aferat e drejtorëve pranë Bashkisë së Tiranës.

Hoteli në Durrës përmendet nga punonjësit e Bashkisë së Tiranës në bisedat mes tyre.

Sipas përgjimeve të zbardhura nga dosja e SPAK-ut, punonjësja Jona Bejko bisedon me një tjetër person dhe zbulon se “5D Konstruksion” po ndërton një hotel. Ajo thotë se aksioner është edhe vetë kryebashkiaku Veliaj, përveç drejtorëve.

“Gjatë hetimeve paraprake është sekuestruar telefoni celular i shtetases Jona Bejko punonjëse në shoqërinë “5 D Konstruksion” shpk për të cilin është kryer ekspertimi teknik si dhe kqyrja dhe analizmi i të dhënave të përfituara nga akti i ekspertimit.

Rezulton se Bejko ka pasur biseda me interes me një individ të identifikuar si Arban, me të cilin ka zhvilluar një sërë bisedash, që lidhen me punën e saj të përditshme. Në datën 06.01.2023 Jona Bejko i dërgon bashkëbiseduesit një foto ku duket një objekt dhe më pas midis tyre zhvillohet kjo bisedë:

Jona Bejko: Këtë hotelin po e bëjmë ne. Është aksioner pronari jonë, Lali Eri e këta. Dhe unë marr vetëm 600 mijë lekë të qelbta. Plasi lufta këtej nga zyra. U zu me shefen e financës keq fare Nestori. Ajo i përplas derën në fytyrë. Ky e përzë në shtëpi. Qr mirë që s’u rrafën se ke idenë çfarë bëri këtu. Me të thënë Nestori pra hapur fare në anën e kujt je”, thuhet në dosjen e SPAK-ut./ CNA





Lajmet e fundit nga