"Altin Dumani ka bërë një punë të lavdërueshme"/ Ambasadori Vos: Do të vijojmë bashkëpunimin

11 Shtator 2025, 17:52, Aktualitet CNA

"Altin Dumani ka bërë një punë të

Ambasadori i Holandës në Shqipëri, Reinout Vos gjatë një vizite në qytetin e Korçës iu përgjigj interesit të gazetarëve për zhvillimet e fundit në vendin tonë dhe propozimin e kryeministrit Edi Rama për uljen e numrit të deputetëve, apo deklaratat ku hodhi akuza në adresë të organeve të drejtësisë.

"Në lidhje me pyetjen e parë që ka të bëjë me numrin e deputetëve, në Hollandë ne kemi 150 deputetë, në Gjermani është një numër tjetër, secili nga vendet anëtare ka një mënyrë pavarësie për sa i përket mënyrës së rregullimit të ndërtimit të parlamentit dhe numrit të deputetëve ndaj kjo nuk është një çështje për ne. Tani të kalojmë tek çështja e dytë që ka të bëjë me çështjet e institucioneve të drejtësisë. Së fundmi, Këshilli i Lartë i Gjyqësorit ka nxjerrë një deklaratë në të cilën ata dënojnë çdo lloj presioni apo ngarkese që shkon në drejtim të institucioneve të drejtësisë ku ju është referuar çdo entiteti publik ose privat dhe ne jemi në mbështetje të plotë të kësaj deklarate," deklaroi ambasadori Reinout Vos.

Ambasadori Vos u pyet edhe për zgjedhjet që pritet të mbahen në SPAK. Vos tha se kreu i kësaj strukture Altin Dumani ka bërë një punë të lavdërueshme dhe se bashkëpunimi bilateral do të vijojë.

"Ju keni qenë dëshmitarë që Shqipëria ka ndërmarrë një sërë reformash shumë të rëndësishme në fushën e shtetit të së drejtës duke nisur nga vetingu, ndërtimi i institucioneve të reja mes tyre edhe SPAK dhe Gjykata e Posaçme. Deri tani ne kemi parë një punë të lavdërueshme nga ana e zotit Dumani. Unë kam besimin e plotë që edhe drejtuesit që do të zgjidhen do të vazhdojnë në të njëjtën rrugë sepse edhe si vend anëtar ne kemi pasur dhe kemi një bashkëpunim shumë të mirë me SPAK në nivel bilateral të bashkëpunimit policor, gjyqësor me ta dhe besoj që do të vazhdojmë në këtë rrugë. Kemi besimin e plotë, tha Vos.

Pyetjes nëse kreu i SPAK, Altin Dumani mund të ketë një mandat të dytë, ambasadori tha se kjo u takon autoriteteve shqiptare dhe është vendimmarrje e tyre.

"Në dijeninë time sipas legjislacionit në fuqi është e pamundur që zoti Dumani të ketë një mandat të dytë të ripërtëritur megjithatë kjo ju përket autoriteteve shqiptare dhe kjo është një vendimarrje e tyre. Unë jam besimplotë që kushdo burrë apo grua që do të zgjidhet në krye të SPAK do të vijojë të ketë të njëjtën performancë të mirë që ne kemi parë deri tani, deklaroi ambasadori holandez./CNA