E fundit!

14:42 Editorial

Çmenduria e një avokati të pandehur

Plarent Ndreca na qenka bërë sot autor i një zbulimi epoka...

“AirAlbania”: “Fluturo kur të duhet, paguaj kur t’i kesh”

29 Janar 2025, 14:03, Aktualitet CNA

“AirAlbania”: “Fluturo kur të duhet, paguaj kur t’i

Foto ilustruese

“AirAlbania” paska dalë me një deklaratë pas akuzave të Arben Ahmetajt për këtë kompani.

“AirAlbania” nuk sqaron akuzat, por i kërkon Ahmetajt që t’u paguajë borxhet e udhëtimeve (familjarisht). (LEXO KETU)

Nuk duam të ndalemi fare tek akuzat e Ahmetajt për këtë kompani ajrore, që duke mbajtur në denominim të vet emrin identifikues te shtetit shqiptar në botë, duket se përfaqëson më shumë sesa thjesht pronarin privat.

Mbase si fillim i duhet kërkuar pronarit faktik, që t’i ndërrojë emrin kompanisë ajrore që zotëron. Kështu edhe do dukej më e qartë që Arben Ahmetaj nuk ka udhëtuar me avion shtetëror, por me një kompani private ajrore që aplikuaka një metodë të jashtëzakonshme në rezervimin e karrigeve të fluturimit ajror.

Nëse Arben Ahmetaj ka udhëtuar pa paguar paraprakisht biletat, cili është opsioni online, ose agjencia turistike që ofron këtë tip fluturimi “fluturo kur të duhet dhe paguaj kur të duash”?

Faqja e “AirAlbania”-s nuk e ka opsionin “alla-Ahmetaj”!

Nëse hyn tani që të kërkosh rezervim, të del çmimi dhe nuk ka opsion që të mund të sigurosh biletë pa paguar kokërr më kokërr gjithçka!

Ku i ka prerë biletat Ahmetaj dhe familja e madhe e tij?

“AirAlbania” duhet të sqarojë se çfarë ka marrë në këmbim nga zyrtari Ahmetaj, për udhëtimet pa pagesë (familjarisht)?

Sa kohë ka borxhi i Ahmetajt, që fle në sirtarët e “AirAlbania”-s dhe pse ai borxh nuk kërkohet në rrugë gjyqësore?

Kujtojmë se Kodi Civil parashikon edhe parashkrime të afateve për shlyerjen e borxheve që nuk i kërkon askush.

Duket e çuditshme që “Air Albania” u kujtua për borxhet “Ahmetaj”, vetëm pasi ky i fundit u kujtua për “Air Albania”-n!

Deri tani, sa kohë “AirAlbania” nuk shpjegohet, fluturimet pa pagesë të Ahmetajt duken si mitmarrje dhe në këtë vepër penale ka një palë që merr përfitimin dhe një palë që e jep me bujari. Njëjtë si “AirAlbania”!

“AirAlbania” me atë rast duhet të publikojë gjithë listën e atyre që kanë fluturuar me këtë kompani sa herë u është dashur dhe kanë paguar kur kanë pasur mundësi. Nëse i kanë paguar!/ CNA