Afera e 430 milionë eurove/ Rama “mburojë” e korrupsionit

24 Shkurt 2022, 08:31, Politikë CNA

Deputetja e PD, Jorida Tabaku ka reaguar sërish sot në lidhje me dëshminë e djeshme të kryeministrit Edi Rama, në Komisionin Hetimor Parlamentar për inceneratorët.

Në një postim në rrjetet sociale, Tabaku shkruan se Rama dje mbronte korrupsionin duke u justifikuar me gjoja qëllimin e mirë.

Sipas Tabakut, Rama ishte në dijeni sepse ka firmosur mbi ato shkresa që i dhanë jetë aferës së 430 milionë eurove.

?Shqiptarët dëgjuan me zë dhe panë kryeministrin se si dje mbronte korrupsionin duke u justifikuar me gjoja qëllimin e mirë.

Ai ishte në dijeni sepse ka firmosur mbi ato shkresa që i dhanë jetë aferës së 430 milionë eurove.

Në cilësinë e një dëshmitari nën betim kryeministri Rama u kthye në avokatin e atyre ministrave dhe ish ministrave të përfshirë në aferë. Ku njëri prej tyre sot është pas hekurave.

U shndërrua në mburojën e atyre bashkiakëve që kanë abuzuar me detyrën siç qe rasti inceneratorit të Tiranës ku na risolli një VKB që është miratuar pasi është nënshkruar kontrata.

Dje, propaganda u stërlodh për mbi 10 orë për të na mbushur mendjen se nuk kanë vepruar si një grup strukturuar kriminal. Në koordinim perfekt për të manipuluar dhe abuzuar me 430 mln euro.

Dëshmitari Rama nuk mundi dot të na tregonte se përse përgjegjësi ka vetëm një minisër kur ka firmosur dhe kryeministri.

Dëshmitari Rama nuk arriti të na shpjegonte se përse për 430 mln euro me gjithë akuzat ai nuk ndërmorri kurrë një hetim administrativ. Madje as se përse ende nuk ka nisur një të tillë!

Dëshmitari nuk na sqaroi se çfarë konkluzionesh arriti inspektimi financiar që vetë urdhëroi në 2020 për inceneratorët.

Nën kodin e heshtjes ai dje mbrojti veprën e dalë nga korrupsioni duke u përpjekur të propagandojë dhe intimidojë me raste komisionin.

Shqiptarët panë me sytë e tyre një kryeministër që mendoi se me aktrim do të mund ti ikë përgjegjësisë. Nuk mbyllet këtu kjo histori!

E vërteta për vjedhjen e 430 mln euro do të dalë shpejt. Mjerë ata që gënjyen, mjerë ata që u tallën dhe mjerë ata që mashtruan shqiptarët për një skemë të tillë korrupsion dhe pastrimi parash!?-shkruan Jorida Tabaku./CNA.al