Çmenden financat/ Koncesion 70 milionë euro tek karburantet

22 Shkurt 2022, 12:39, Denoncim CNA

Nga Klodian Tomorri

Ndërsa e gjithë vëmendja e opinionit publik është fokusuar tek çështja e inceneratorëve, Ministria e Financavë po bëhet gati që të japë një koncesion të maskuar 70 milionë euro në tregun e karburanteve. Këto para do u merren qytetarëve shqiptarë në 20 vitet e ardhshme. Jo me ligj, as me VKM. Por me një udhëzim të thjeshtë të ministres së Financave.

Delina Ibrahimaj pranoi publikisht se Ministria e Financave ka nisur të shqyrtojë kërkesën e kompanisë koncesionare NOA Control për dyfishimin e tarifave të kontrollit mbi pompat e karburanteve. Praktikisht ky është një koncesion i ri. Por pse?

Aktualisht kompanitë e naftës paguajnë 14 mijë lekë në vit për çdo pistoletë karburanti që kanë në stacionet e tyre. Këto para ua marrin qytertarëve shqiptarë në çmimin e karburanteve dhe ia paguajnë shoqërisë koncesionare Noa, e cila verifikon sasinë e lëngut që del nga pompat e karburanteve, që ndryshe njihet si kontrolli ligjor.-raporton MCN.

Por në vitin 2020, maxhoranca miratoi ligjin e ri për metrologjinë duke i dhënë shoqërisë Noa të drejtën që të kryejë edhe shërbimin e regjimit automatik. Një shërbim që nuk është në kontratën e koncesionit, pra shtesë. Kjo i hapi rrugën aferës që po realizohet tani.

I ashtuqujturi sigurim i regjimit automatik nuk është asgjë tjetër përveçse një plumbçe, që i vendoset pompës së karburantit për t?u siguruar që ajo nuk mund të manipulohet manualisht, por punon vetëm në regjim automatik. Njësoj si vula në sahatin, që ka çdo familje në shtëpi për matjen e energjisë.

Ky shërbim deri më tani është kryer nga tre shoqëri të autorizuara nga Drejtoria e Metrologjisë dhe tarifohej 6 mijë lekë, vetëm një herë kur pompa instalohej në stacionin e karburantit. Më pas, nëse pompa pësonte defekt, atëherë shoqëritë e karburanteve detyroheshin të thërrisnin sërish një nga tre shoqëritë për të ricertifikuar regjimin automatik.

Me ligjin e ri për metrologjinë, regjimi automatik praktikisht është shndërrua në një monopol të kompanisë Noa. Tashmë, Ministria e Financave po përgatit udhëzimin, që shërbimi të mos tarifohet vetëm një herë kur instalohet pompa në stacionin e karburantit, por të tarifohet 2 herë në vit dhe tarifa të mos paguhet për pompë, por për çdo pistoletë. Një pompa ka mesatarisht 15 pistoleta.

Përmes udhëzimit, ministrja e financave po u merr qytetarëve shqiptarë 70 milionë euro në 20 vitet e ardhshme. Jo për llogari të buxhetit, por për llogari të koncesionarit privat. Kjo është grabitje.

Në morinë e koncesioneve të dhëna në Shqipëri, ky është më i çuditshmi, më grabitqari dhë ndoshta edhe më korruptivi. Qytetarëve shqiptarë po u merrën 70 milionë euro për një shërbim që praktikisht nuk kushton asgjë. Jo me ligj, as me Vendim të Këshillit të Ministrave. Thjesht me udhëzimin e ministres së financave, e cila do të miratojë skemën e re të tarifimit.

Institucioni i vetëm, i cili nuhati këtë që po ndodh sot ishte Presidenti i Republikës. Në nëntor të vitit 2020, kur rrëzoi ligjin e ri ?Për Metrologjinë?, Ilir Meta arsyetoi se dhënia e shërbimit të regjimit automatik tek kompania Noa, do t?i hapte rrugën një koncesioni të ri korruptiv me kosto të rënda për qytetarët. Opozita heshti se u ble. Tani qytetarët do të paguajnë faturën e radhës të korrupsionit të qeverisë dhe blerjes së opozitës. Plot 70 milionë euro.