E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Pse po njolloset ministrja e Financave në aferën e pompave?

21 Shkurt 2022, 09:15, Aktualitet CNA

Nga Klodian Tomorri

Aksioni i Ministrisë së Financave për të dyfishuar tarifën e kontrollit të pompave është një vendim top down.

Burime konfidenciale thonë se urdhri ka ardhur direkt nga ministrja e Financave, Delina Ibrahimaj, e cila ka udhëzuar zëvendësministret dhe stafin e saj teknik ?to get the job done?. Të urdhëruar nga lart, tashmë specialistët e niveleve më poshtë po përpiqen të gjejnë mënyrën se si ta bëjnë realitet marrëzinë e rritjes së taksave private mbi naftën. Ky është rasti klasik i korrupsionit.

Nga ajo çfarë dihet, të paktën publikisht, deri tani Delina Ibrahimaj nuk është përfolur për ndonjë aferë korruptive. Por kjo e pompave i ndryshon llogaritë.

Cështja është pse?

Vendimi që dyfishon tarifat e kontrollit në pompat e karburanteve u merr qytetarëve shqiptarë rreth 2.9 milionë euro në vit, pa përfshirë Tatimin mbi Vlerën e Shtuar. Këto para do të shkojnë për koncesionarin që ka monopolin ekskluziv të këtij shërbimi. Pra ka plot para për t?u ndarë dhe kjo është një arsye potenciale, që i shtyn zyrtarët të njollosin veten.

Së dyti, në të shkuarën koncesioni i pompave është lobuar nga njerëz shumë afër kryeministrit. Kjo mund të jetë një tjetër arsye potenciale. Por pavarësisht arsyeve, nëse është rryshfet apo detyrim nga lart, në çdo rast rezultati është i njëjtë. Çdo zyrtar që firmos një akt si ky i thotë automatikisht lamtumirë virgjërisë në aspektin e korrupsionit. Jo se do të ishte ndonjë çudi e madhe. Fundja një më shumë në hordhinë e madhe të zyrtarëve të korruptuar që ka parë ky vend.

Madje sot zyrtarët që bëjnë korrupsion kanë dhe një fat të madh. Për shkak se e gjithë vëmendja e opinionit publik është përqëndruar tek aferat e mëdha të korrupsionit si ajo e inceneratorëve, aferat më të vogla kalojnë pa zhurmë. Ndoshta ?they?ll get the job done.? Por firmat dhe letrat do të mbeten aty edhe pas 5 apo 10 vjetësh. Njësoj si tek inceneratorët.

Ndoshta një ditë do të shohim edhe specialistët, që po merren me praktikën e pompave, të qajnë dhe meken në dëshmitë e tyre para prokurorisë. Por kjo nuk do të jetë shfajësim. Ata janë të gjithë plotësisht të vetëdijshëm për atë që po bëjnë. Nga ministrja deri tek specialist më i ulët i përfshirë në këtë çështje. Veçanërisht ministrja.

Madje nëse SPAK do të shkonte sot dhe do të sekuestronte praktikën që po ndiqet për të realizuar dyfishimin e tarifës së kontrollit të pompave, qarjet do të fillonin që tani. MCN do të publikojë në vijim dokumenta që tregojnë se aty janë çuar vendime të gatshme për firmë nga dhe drejt palëve të treta. Me dijeni të plotë të kupolës drejtuese të ministrisë.