LEXO PA REKLAMA!

SHKARKO APP

E gjithë Shqipëria mes ditës së parë të punës dhe ditës së fundit të shpresës

28 Qershor 2021, 05:59, Opinione CNA
E gjithë Shqipëria mes ditës së parë të punës

Nga Arian Galdini

Kur nisesh me familjen për pushime, ndodh të të vijë një 20 vjeçar me makinë luksoze, e familjarisht të të  asgjësojë e flakë tej përdhunisht nga rruga e nga jeta.

Kur një 20 vjeçar i vuajtur në kërkim të shpresës, gjen punën e tij të parë, i ndodh që pikërisht në ditën e tij të parë të punës së parë, ti vijnë ca nga këta të “biznesit të pushimeve”, e ta nxjerrin përdhunisht nga puna e nga jeta.

Ja kjo është Shqipëria ime, Shqipëria jonë sot. Ne jetojmë sot në trajektoren e këtyre dy 20 vjeçarëve.

Njëri 20 vjeçar pa asnjë ditë punë, pa asnjë shqetësim, madje me makinë luksoze e shpejtësi marramendëse për të arritur çdo destinacion e gjithçka i do zemra, e tjetri 20 vjeçar plot derte, halle, vuajtje e nevojë për të punuar që të mbajë veten dhe ndihmojë familjen.

I pari, prej luksit e nxitimit, asgjëson një familje.I dyti, bie martir i punës së tij të parë, që në ditë të parë. Ç’të thuash e ç’të shkruash përballë kësaj Trajetore mes këtyre dy 20 vjeçarëve, që e ka bërë Shqipërinë tonë kaq çmendurake e madje skizofrenike.

 

Them skizofrenike, sepse e vërteta e hidhur është se 20 vjeçari i parë, në kohët e sotme që jetojmë është në fakt modeli.

Ndërsa 20 vjeçari i dytë është i shpëtfilluri, i harruari e shpesh herë edhe viktima. Nuk ka si të jetë ndryshe…

Sepse Pronarët e Hoteleve, Universiteteve, Resorteve, Televizioneve, etj, etj, në Shqipëri, janë baballarët e 20 vjeçarit të parë.

Politikanët plaçkaxhinj, Gjykatësit dhe Prokurorët e Korruptuar, Policët e Taksidarët Doganierët e Kadastrinot Gjobëvënës e Hajdutë, janë baballarët e 20 vjeçarit të parë.

20 vjeçari i dytë ose i ka prindërit të ndershëm e të mjerë, ose nuk i ka fare.

Janë përmbysur të gjitha raportet e vlerat. Nxitimi i 20 vjeçarit të parë për të arritur ku të dojë, është si lufta e Pronarëve të Hoteleve për shezlongje në Velipojë.

Ai 20 vjeçari me makinë luksoze mendon se bota është e tij, rruga është e tij, policia është e tij, kësisoj ai nuk ka pse të mendojë për askënd e asgjë tjetër…

Ai nuk e kupton se nxitimi i tij në “rrugën e xanun”, mund të sjellë pasoja fatale e tragjike për këdo që mund ti ndalë nxitimin…

Edhe Pronarët e Hoteleve në Velipojë, nuk mendojnë fare për atë 20 vjeçarin e ditës së parë të punës…Ata nxitojnë të luftojnë për “tokën e xanun”.

Në këtë luftë që bëhet për “shtetin e xanun” mes partive, për “studion e xanun” mes televizioneve, për “intelektualin e xanun” mes Universiteteve apo për “deputetin e xanun” mes bandave e të fortëve, sigurisht që nuk ka si të shmanget edhe lufta e nxitimi për “rrugën e xanun” mes 20 vje

çarëve me makina luksoze apo për “tokën e xanun” mes “cubave” me status pronarësh hoteli.

“Shteti i Xanun”, i shet liçensat e shërbimet. “Shteti i xanun” nuk u kontrollon burimet e të ardhurave e as u bën vetting pasurie e pastërtie të figurës as Pronarëve të Hoteleve e as baballarëve të 20 vjeçarëve me makina luksoze.

Si mund ta konsiderosh turizmin si prioritet kombëtar, e tu japësh leje ndërtimi e liçnsë njerëzve të cilët nuk kanë kaluar në verifikim të imtësishëm e të thellë pasurie e cilësishë qytetare?

Si mund të shohësh një çunak më makinë luksoze të mos ia ndalësh makinën e ti kërkosh verifikim pasurie e të ardhurash atij dhe prindërve të tij?

Sepse nëse babai është biznesmen e i justifikon të ardhurat me të cilat ia ka blerë makinën luksoze të birit, të paktën të mbajë përgjegjësi të plotë për “krimin” e të birit që buron nga keqprindërimi i babait.

Duhen ca balanca në këtë shoqëri..

Duhen të fillojmë të flasim e debatojmë për llojin e Shqipërisë që duam…

Unë sot ndihem Shqipëria e Myzerin Zenelit. Por nuk dua që edhe nesër të kemi po të njëjtën Shqipëri.

Për 20 vjeçarët që duan të punojnë ndershmërisht, duhet të bëjmë një Shqipëri të ndershme. Shqipëria e xanun, po na përzë ose po na zë nën të…

Na duhet një Shqipëri e Lirë dhe e Ndershme. E duhet ta bëjmë ne bashkë luftën e ndershme, të njerëzve të ndershëm për një Shqipëri të ndershme. Përndryshe, 20 vjeçarët tanë do të jenë shumica mes modelit me makinë luksoze dhe Myzerin Zenelit./ CNA.al

Lajmet e fundit nga