Fakti-Gara për kreun e PD e paravendosur/ Basha manipulon fushatën

1 Qershor 2021, 10:19, Politikë CNA

Kryetari i Republikës së re, Lulzim Basha duket se ecen me atë parimin, ?bëj çfarë them unë, por mos bëj çfarë bëj unë?.

Nga njëra anë del e bërtet e ulëret, se Edi Rama ia vodhi zgjedhjet, se 25 prilli ishte masakër zgjedhore, e të tjera si këto, kur në fakt edhe vetë ai duket se po bën të njëjtën gjë, brenda partisë së tij.

Të gjitha faktet dhe detajet, tregojnë se Lulzim Basha po përgatit të gjithë infrastukturën, që zgjedhjet e 13 qershorit, të jenë një tjetër ?masakër zgjedhore?.

Së pari, data 13 qershor është kritikuar ashpër jo vetëm nga kundërshtarët e Lulzim Bashës, por edhe vetë lideri historik i demokratëve, Sali Berisha, i cili në një dalje mediatike e ka thënë që gara duhej të ishte shtyrë, tani PD kishte detyra të tjera.(Lexo ketu)

Por, Lulzim Basha vendosi që zgjedhjet të mbahen në 13 qershor, duke mos iu lënë kohë kandidatëve për fushatë, dhe në krye të Komisionit Zgjedhor, vendosi Jemin Gjanën.

Dhe ndërkohë që flet për bashkime, garë të ndershme, e të tjera brockulla si këto, Lulzim Basha duket se bën krejt të kundërten e atyre që thotë, dhe gara për zgjedhjen e kreut të PD, nuk është as e ndershme dhe as në kushte të barabarta.

Lulzim Basha ka kryetarët e degëve, ka administratën e PD, ka listat e anëtarësisë, ka në dispozicion të gjithë infrastrukturën e PD, ndërsa kandidatët e tjerë nuk kanë asgjë.

Po të shikosh faqen zyrtare të Partisë Demokratike në rrjetet sociale, aty ku dhe ndiqet më shumë, duket se gjithë infrastruktura është vënë në shërbim të Lulzim Bashës.

Çdo ditë PD transmeton video të takimeve të Lulzim Bashës me demokratët në qytetet e Shqipërisë, të gjitha takime në kuadër të fushatës për 13 qershorin, ndërsa për kandidatët e tjerë nuk ka asgjë, asnjë takim, asnjë video, asnjë fjalim. Partia Demokratike, është vënë e gjitha vetëm e vetëm në shërbim të Lulzim Bashës.

Sikurse shikohet edhe në fotot më poshtë, të marra nga faqja zyrtare në rrjetet sociale, PD ka transmetuar çdo takim të Bashës, por asnjë të tre kandidatëve të tjerë që garojnë për kryetar.

I vetmi kandidat, që është nxjerrë live vetëm një herë në faqen zyrtare të PD, është Fatbardh Kadilli. Por, edhe ky vetëm një herë, në prezantimin e kandidaturës.

Ndërsa prej datës 19 maj, është publikuar me video dhe foto çdo takim i Lulzim Bashës.

Çka tregon qartë se fushata është e manipuluar, gara e paravendosur dhe gjithë infrastruktura është vetëm në funksion të Bashës.

Prandaj dhe Lulzim Basha ka frikë të japë dorëheqjen dhe të bëjë garë të ndershme, sepse do të humbte nëse gara do të ishte e ndershme dhe në kushte të barabarta, ai me siguri që do të humbte.

Në galerinë më poshtë shikoni foto nga takimet e Bashës, në çdo qytet, të transmetuara të gjitha në faqen zyrtare të PD: / CNA.al