Takaj: Marrim gjashtë pikë ndaj Kukësit dhe Partizanit

22 Korrik 2020, 16:52, Sport CNA

Skënderbeu është në një moment delikat për sa i përket vijimësisë së sezonit. Nga njëra anë e ardhmja e klubit dhe skuadrës është e lidhur ngushtë me vendimin që do të merret në Gjykatën Federale në lidhje me dënimin që u është dhënë korçarëve. Në anën tjetër janë dy ndeshjet finale që do të përcaktojnë nëse bardhekuqtë do të mund të pretendojnë deri në fund për të kapur një vend që të çon në Europë, teksa në rastin më të keq do të shlyenin vitin e katërt të dënimit 10-vjeçar.

Gjithçka duket sa e komplikuar aq edhe e vështirë, sidomos pas zgjidhjes që mori kampionati në javën e kaluar. Gjithsesi, bardhekuqtë duhet të jenë të përqendruar për çdo lloj situate, me qëllim që të tregojnë se ia kanë bërë hyzmetin punës deri në fund. Ky ka qenë edhe mesazhi i presidentit të Skënderbeut, Ardjan Takaj, i cili ditën e djeshme është takuar me ekipin para seancës stërvitore. Ai u ka kërkuar lojtarëve përqendrim dhe sforco finale për të arritur objektivin sezonal që ka caktuar klubi që prej fillimit. Fillimisht numri një i klubit korçar ka kërkuar nga të tijtë maksimumin në ndeshjet e fundit të sezonit, duke filluar me Kukësin në transfertë e më pas ndaj Partizanit në shtëpi. Takaj është i bindur se duhet të merret maksimumi, si e vetmja mënyrë për të pasur një shans që të jetë në zonën europiane.

?Mbeten edhe dy javët e fundit të kampionatit dhe normalisht që janë sfidat më të vështira. Objektivi është ende atje, në lojë dhe duhet të bëjmë më të mirën për ta arritur. Duhet një sforco e fundit për ju dhe të gjithë ne. Të marrim gjashtë pikë në këto ndeshje dhe më pas të shohim se si do të jetë verdikti i sezonit. Jam i bindur se me pikët e plota do të jemi ne që do të kapim atë pozicion. Më pas të presim të qetë vendimin e Gjykatës Federale, duke shpresuar që e drejta jonë të vihet në vend?, mësohet të ketë thënë ndër të tjera dje para skuadrës presidenti i bardhekuqve.\

Situata është delikate te Skënderbeu për sa i përket kapjes së pozicionit të Europës. Në dy javët e fundit korçarët e gjejnë veten me 54 pikë, të pestët, po aq sa Teuta, por me golavarazh më të keq. Në vendin e tretë ndodhet Laçi në kuotën e 58 pikëve. Ajo që u duhet korçarëve në këto dy javë të fundit qëndron te fakti që bardhekuqtë të fitojnë të dyja takimet e radhës dhe në anën tjetër Teuta të lërë pikë dhe njëkohësisht të humbë finalen e Kupës përballë Tiranës. Ose, në të kundërt, Laçi të ndalet dy herë. Tashmë gjithçka nuk është në dorë të korçarëve, por të paktën bardhekuqtë duhet të bëjnë punën e tyre deri në fund. Kjo pak a shumë ka qenë edhe kërkesa e Takajt karshi lojtarëve për të menduar më pas të ardhmen e ekipit, pikërisht pasi të ketë dalë vendimi zyrtar i Gjykatës Federale.