Liverpooli feston sot titullin, Klopp: Dita më e bukur e jetës sime, do jetë si Krishtlindje

22 Korrik 2020, 09:34, Sport CNA

Jyrgen Klop thotë se triumfi në Premier Ligë me Liverpulin këtë sezon është një nga ditët më të bukura të jetës së tij, por kjo nuk duhet të jetë e fundit, duke i nxitur djemtë e tij për të tjera suksese në ishull. Ai dhe futbollistët do të ngrenë trofeun sot në ?Anfield Road? pas ndeshjes kundër Çelsit, e cila është e fundit e tyre në shtëpi.

Në konferencën e djeshme për shtyp, trajneri gjerman e krahasoi ceremoninë e kurorëzimit kampion të skuadrës së tij me festën e Krishtlindjes dhe tha se është shumë krenar që më në fund do të prekë trofeun që i mungon skuadrës prej 30 vitesh. ?Nga pikëpamja profesionale, është 100% një nga ditët më të bukura të jetës sime që më në fund do të prekim trofeun që të gjithë e kanë pritur kaq gjatë. Mendoj se dy-tri vite më parë, askush nuk mendonte se kjo gjë do të ishte e mundur për ne, veçanërisht për shkak të të gjitha sfidave që ne hasëm dhe rivalëve që kemi. Do të jem krenar.

Do të mendoj për djemtë dhe gjithçka bëmë së bashku në këtë klub. Është një ditë shumë e rëndësishme, por jo dita e fundit më e rëndësishme për ne. Është pak si një Krishtlindje: edhe pse ti e di dhuratën që do të marrësh, është ende shumë emocionuese kur e merr atë?, deklaroi tekniku gjerman. ?Reds?-at vijnë në ndeshjen kundër Çelsit pasi kanë lënë 8 pikë në pesë takimet e fundit, duke e bërë këtë rezultatin më të dobët që një skuadër kampione regjistron pasi ka siguruar titullin.

Klop thotë se ky është një problem i ngjashëm që i ndodhte Bajernit të Mynihut kur ata konkurronin me Dortmundin e tij në Bundesligë: ?Kur Pep Guardiola ishte te Bajerni dhe ne vinim të dytët pas tyre shumë shpesh, ndodhte e njëjta gjë. Ata dominonin kampionatin derisa shpalleshin kampionë dhe më pas humbisnin disa ndeshje. Bajerni nuk kishte asgjë për të luftuar atëherë, por unë jam shumë i kënaqur se si kemi luajtur. Nuk është se kemi humbur përqendrimin. Ne ishim skuadra më e mirë kundër Arsenalit, por humbëm për arsye të kuptueshme. Kështu që, unë mund t?jua shpjegoj. Ne kemi luajtur një sezon të shkëlqyer dhe unë nuk dua që ta zbehim atë?.