web counter
LEXO PA REKLAMA!

SHKARKO APP

App Store
Google Play

E fundit!

x

Nga Armir Shkurti/ Polici që mban epideminë

13 Mars 2020, 13:53, Aktualitet CNA

E para sëmundje që trajtohet nga policia e jo nga mjekët! Në jetë nuk kam parë situatë të tillë. Kur them “policia” nënkuptoj politikën. Tjetër trajtim i ka bërë covid-19 Britania, që vazhdon jetën normalisht, tjetër Kina, tjetër Italia e tjetër ne.

Në Itali shpërthimi i epidemisë çoi në kolaps sistemin shëndetësor. Do të thotë u sëmurën në të njejtën kohë më shumë pacientë seç ka mundësi sistemi të trajtojë. Kështuqë ndalimi i lëvizjeve, ngujimet nëpër shtëpi etj nuk synojnë tjetër veç ngadalësimin e përhapjes së virusit duke e mbajtur brenda mundësive të trajtimit nga spitalet, karantinat apo qendrat e specializuara.

Kjo skemë po duket se po zbatohet edhe tek ne. Shifrat, të dhënat, karantinat, masa, gjobat, lejimet, ndalimet..gjithçka po i merr kryeministri përsipër.
Me urdhër të kryeministrit janë mbyllur baret, restorantet, sportelet, transporti publik, shkollat dhe shumë aktivitete të tjera. Do të thotë të ngadalësojë ndjeshëm, deri në mbyllje përfundimtare i gjithë zinxhiri ekonomik. Pas një restoranti qëndrojnë fermerë, blegtorë, transportues, përpunues. Natyrisht edhe mijëra punonjës që mbahen me rrogë. Thjeshtëzova vetëm një sektor për të kuptuar humbjen. Nëse do ti paguajë punëtorët që po rrinë në shtëpi një pjesë e këtij zinxhiri rrezikon ekzistencën. Nëse nuk i paguan, janë dhjetra mijë që s’do kenë rrogë e për rrjedhim pasojat edhe sociale bëhen më shpërthyese se prej vetë epidemisë.

Mbrëmë në një studio kryetari i bashkisë së Tiranës i rrëshkiti përgjigjes se si do të bëhen pagesat e punonjësve që po rrinë nëpër shtëpi. Pra ne nuk e dimë në ka një plan për ekonominë, rrënimi i së cilës është – e përsëris – shumë më i rrezikshëm se virusi.
Prej politikave të rilindjes ramore shtresa e mesme është drejt zhdukjes. Tërmeti i 26 nëntorit goditi zemrën ekonomike të vendit (Durrësi dhe Tiranën). Që ato ditë specialistët e ekonomisë parashikuan më të madh dëmin që vjen nga dëmtimi i aktiviteteve sidomos në Durtës sesa nga tullat e betoni që ranë. 3 muaj e ca më vonë vjen ky ngujim total nëpër shtëpi.

Frenimi i ekonomisë këto ditë nuk është kurrgjë para anulimit të sezonit turistik. Sipas INSTAT në periudhën ’14 – ’17 turizmi ze 13.3% të Prodhimit të Brendshëm Bruto. A imagjinohet një anulim masiv prenotimesh për këtë sezon turistik? Hotele, restorante, agjenci transporti, agjenci udhëtimesh e plot shërbime të tjera që mezi presin prill – tetor shullehen në diell?

Pra me polici mirë. Mundet ta ndalojë më mirë se doktori epideminë. Por nuk ka shembuj që me ta të bëhet ekonomia.
Në një analizë timen, pak para shpalljes së rastit të parë me virus në Shqipëri kam parashikuar saktësisht dyndjen e qytetarëve në dyqane, zbrazjen e rafteve, rritjen e çmimeve, panikun dhe pakënaqësinë. Mu thaftë gjuha, por kam paralajmëruar edhe zemërim e ndoshta revoltë ( nuk ma nxe goja trazira) për shkak të mungesave në treg a mungesës së parave në xhep. Do të jem i lumtur dhe uroj me shpirt që të gaboj!

Ende ka kohë. Meqë e ka marrë politika të gjithën në dorë situatën, ta ndalojë daljen e vendit jashtë kontrollit. Fjalët e shenjta që poston apo arroganca që Rama lëshon në ekrane mbajnë sa kohë mileti e ka një pako makarona e dy miell në raft. Ditën kur pjata është bosh asgjë më s’bën derman!/ CNA.al





Lajmet e fundit nga