Faktet/ Ilir Meta po kërkon Kushtetutë të re

23 Nëntor 2019, 10:50, Politikë CNA

Presidenti i Republikës prej disa ditësh ka filluar një betejë të ashpër publike me sulme dhe akuza ndaj ndërkombëtarëve.

Ka sulmuar në mënyrë të pandalur jo vetëm atë që tashmë e quan ?armikun? e tij, kryeministrin Edi Rama, por një debat të ashpër ka filluar ta ketë edhe me ndërkombëtarët. Me ambasadorin italian, me ambasadorin e BE-së dhe me ambasadën e SHBA në Tiranë.

Ilir Meta në disa qëndrime të tij, shpesh të publikuara edhe nga zëdhënësi i Presidencës Tedi Blushi, kanë thënë se është shkelur Kushtetuta, është shkelur çdo parim dhe çdo rregull, janë bërë disa lojëra me ndërkombëtarët, në kurriz të Presidentit të Republikës.

Kreu i shtetit, dje në mbrëmje doli hapur fare. Pas artikulimit të një dite më parë, ai e tha qartë. Kërkon referendum.

Se përse dhe për çfarë ende nuk e dimë. Por, faktet të bëjnë të kuptosh se Ilir Meta kërkon ndryshimin e Kushtetutës, pasi ka thënë disa detaje në artikulimin e tij.

Ai tha se kemi një Kushtetutë të tradhëtuar. Pra, Kushtetuta e vitit 1998 ishte tradhëtuar disa herë. Këtu ka të drejtë presidenti Meta.

Kushtetuta e ?98-ës ka pasur dy ndërhyrje të forta dhe në të dyja rastet, Ilir Meta ka qënë kundër. Në rastin e dytë, në momentin e fundit ai u tërhoq dhe votoi ndryshimet Kushtetuese, por ishte më pas kundër ligjeve, të cilat qeveria i votoi vetëm me votat e saj.

Ai ka qënë kundër ndryshimeve të Kushtetutës në vitin 2008, të cilat iu bënë me marrëveshjen Berisha-Rama.

Më pas në vitin 2015-2016, me ndërhyrjen e ndërkombëtarëve, me Reformën në Drejtësi, goditjen e bënë të gjithë bashkë. Por, Rilindja bëri ca ligje dhe ndërhyrje të tjera të cilat e bënë Kushtetutën e vitit 1998 në një palo Kushtetutë, por që në fakt si e tillë u ngjiz që në fillim.

Në atë kohë, pra para rreth 21 vitesh, pak kohë pas vrasjes së Azem Hajdarit në 14 shtator, Shqipëria ishte në një situatë tepër kaotike. Menjëherë u gjet një hap dhe një mënyrë për të sjellë paksa stabilitet. Vendi të bëhej me Kushtetutë. U ndërtua një komision ku bënin pjesë Arben Imami, Sabri Godo, si përfaqësues të opozitës.

Në fakt, opozita e emëruar pasi në atë kohë Imami kishte qënë ministër Drejtësisë, Godo quhej aleat apo zgjatim i kryeministrit të asaj kohe, Fatos Nano dhe më pas i Ilir Metës, Majkos e kështu me radhë.

Një Kushtetutë që nuk u njoh në atë kohë nga Partia Demokratike. U bojkotua dhe u quajt si një hap i gabuar, pasi dha pasoja të forta në zgjedhjet e ardhshme. Bojkotin e demokratëve, socialistët e përdoren për manipulime zgjedhore në vitet 2000-2001, 2003 e në vazhdim, duke luajtur me listat elektorale.

Por, edhe pse e kontestoi fort Kushtetutën opozita, me ardhjen në pushtet të Sali Berishës e respektoi fort dhe nuk kërkoi ndryshimin e saj, por ia dha goditjen në marrëveshjen me Ramën në 2008, duke kërkuar një sistem tjetër zgjedhor, pasi Berisha e shihte se me mazhoritar, PD do ta kishte mjaft të vështirë fitoren në zgjedhje.

Duke ndjekur sondazhet dhe duke parë trendin politik në opinionin publik, Berisha bëri një marrëveshje, duke ngritur një koalicion, duke shfrytëzuar çdo hapësirë të sistemit zgjedhor dhe sërish nuk arriti dot të fitonte. Ai shkoi vetëm në 70 mandate dhe u detyrua të merrte Ilir Metën në krah, i cili kishte bërë dhe një grevë urie dhe e kishte kundërshtuar ashpër Kushtetutën e vitit 2008.

Më tej, Meta e tradhëton dhe shkon tek Edi Rama në vitin 2013, sjell socialistët në pushtet dhe qeveris me kreun e Rilindjes.

Kundërshton hapur dhe ashpër Reformën në Drejtësi, ndryshimet kushtetuese të asaj kohe, pra të vitit 2015-2016, të bëra me një ndërhyrje të fortë të ndërkombëtarëve dhe një dalje hapur. Kujtojmë këtu qëndrimet e forta të ish-ambasadorit të SHBA, Donald Lu dhe ambasadores së BE-së, Romana Vlahutin.

Në atë kohë, Ilir Meta në një fjalim të tij live në parlament iu drejtua ambasadorit amerikan, duke thënë se nuk ishte kundër Reformës në Drejtësi dhe se ato që thuheshin për të ishin fjalë.

Mesa duket tani jemi kthyer në të njëjtën situatë. Ilir Meta ka nxjerrë ?shpatën? sërish ndaj ndërkombëtarëve, duke kërkuar hapur tërheqjen e tyre nga ndërhyrjet që ata bëjnë për zgjidhjen e ngërçeve politike në Shqipëri apo përplasjeve të shumta politike, interpretimeve apo keqinterpretimeve që iu bëhen ligjeve dhe Kushtetutës.

Këtë të fundit e quajti të tradhëtuar, e quan me vlerë referendumin dhe Kushtetutën e vitit 1998 dhe nuk pranon ndryshimet e bëra dhe ndërhyrjet e tanishme.

Ka qënë i ashpër, i qartë dhe i fortë në qëndrime. Të gjitha faktet na thonë një dhe vetëm një argument. Ilir Meta kërkon ndryshimin e Kushtetutës./ CNA.al