Pas legalizimit/ Kanabisi lulëzon ekonomitë në krizë

1 Gusht 2019, 18:03, Ekonomi CNA

Dhjetëra licensa për ta kultivuar për qëllime mjekësore bimën e “mallkuar” presin miratimin nga institucionet përgjegjëse të Maqedonisë së Veriut, ekonomia e të cilës dy vite pas miratimit të ligjit që e lejon kultivimin e lendës narkotike “Canabis sattiva” ka njohur ritme rritjeje.

Maqedonia e Veriut është një ndër vendet e paketa të Europës që prej tre vitesh ka legalizuar industrinë e kanabisit që përdoret për qëllime mjekësore. Por ky vend nuk është i vetmi. Industria e kultivimit dhe përpunimit të drogës së llojit kanabis po sjell përfitime marramendëse për të gjithë vendet që po e zhvillojnë atë.

E ndodhur në udhëkryq të rritjes ekonomike dhe mungesës së vëndeve të punës Maqedonia e Veriut i bëri ndryshimet e duhura ligjore në vitin 2016, çka u mundësoi dhjetëra kompanive private të fitojnë licenca për prodhimin e kanabisit.Të dhenat e qeverisë konfirmojnë se aktualisht janë 27 kompani të licencuara për prodhimin e vajit mjekësor të kanabisit, kurse në pritje të licencave janë 17 kompani të tjera. Interesi duket i lartë dhe shifrat jozyrtare flasin për 70-80 kompani, raportojnë mediat.

Sipas këtyre të fundit: kultivuesit thonë se industria e kultivimit të kanabisit për qëllime mjekësore duhet të zgjerohet edhe më shumë, pasi i sjell Maqedonisë së Veriut përfitime të mëdha.

“Është një degë interesante, ku Maqedonia e Veriut mund dhe ka kuadro për këtë biznes dhe për të vazhduar më tej për t?u zhvilluar. Të mos shesim vetëm lulet dhe vajin, por edhe prodhime të gatshme. Statistika jonë tregon se profiti nga eksporti i kanabisit mund të jetë më i madh nga eksporti i mishit të qengjit, verës, pjeshkëve dhe prodhimeve bujqësore në Maqedoni. Është një shans i mirë për vendin”, thotë Slave Ivanovski, pronar i kompanisë ?Oaza Alkaloidi?.

Kompania ?5 Letters? në Krushevë prodhon kanabis për qëllime mjekësore dhe gjithnjë e më shumë po futet në tregjet botërore. Për një litër vaji të kanabisit ata përfitojnë thuajse 95 mijë euro. Kjo kompani ka të punësuar njerëz të rinj e të arsimuar të cilëve u ofron paga dyfish më të larta se mesatarja në Maqedoni.

Qeveria e Maqedonisë së Veriut nuk ka bërë publike të dhënat për sipërfaqet e mbjellura me kanabis, por jozyrtarisht flitet për një sipërfaqe prej rreth 140 mijë metër katrorë. Ndërkohë, thuajse çdo ditë hapen kompani të kësaj veprimtarie e që përmbajnë fjalën kanabis që do të thotë se interesimi për këtë biznes është tejet i madh.

Kryeministri Zoran Zaev thotë se kjo industri ka hapur vende të shumta pune dhe parashikohet të sjellë përfitime deri në 100 milionë Euro në vit në arkën e shtetit. Veç Maqedonisë se Veriut, në Europë kjo industri po lulëzon edhe në Greqi dhe Portugali, dy vende në vështirësi ekonomike që e kanë përdorur kanabisin për të ulur papunësinë dhe për të shtuar të ardhurat e buxhetit. Studimet tregojnë se tregu europian i kanabisit mjekësor mund të arrijë 55 miliardë Euro përfitime deri në vitin 2028, raporton Klan.

Që nga viti 2018, sektori i prodhimit të kanabisit për qëllime mjekësore po sheh zhvillime me ritme te shpejta edhe në Amerikën e Veriut, pasi vlerësohet se përfitimet tregtare janë shumë të mëdha për t?u injoruar.