Letër samitarit me shpatë

16 Korrik 2018, 06:37, Aktualitet CNA

Nga Zef ZEFI

*I dashur shoku kokëministër rilindasi ynë, kryeprokurori, kryegjykatësi, kryedrita jonë.

Edhe pse “futbolli” po na ngatërrohet nëpër këmbë këso ditësh, populli socialist i vatanit, është mbledhur shesheve (të rilindura) të katundeve, lagjeve, qyteteve në shenjë solidariteti me ju.

I madh e i vogël, duke filluar nga kërthinjtë me cicë, biberon deri tek ata me cigare në gojë, janë derdhur shesheve, me fotot tuaja samitiane në dorë.

Duke ju ndjekur nëpërmjet TV, vigjilenca e Rilindjes, vuri re se shpesh jeni gjetur në situata të disfavorshme; i vetëm, fillikat, ligësht, pa miq e shokë, me duar në xhepa, duke u vagabonduar sa tek njëri grup biseduesish tek një tjetër, në pritje të ndonjë vemendjeje, ftese apo fotoje të rëndësishme me ndokënd.

Kjo i preku fort zemrat tona socialiste. Madje nuk ngurrojmë t’ju informojmë se në byro, shumë u lagën sysh, pas lagies së syve, disa prej pjeshkave e spiropaleve filluan të klithin me lemzë. Nuk zgjati shumë po si në një gjëmë, u dëgjua kuisja e Braçeve me Ballët. Në fillim të gjithë menduam se librazhdasit i plasi damari i folklorit dhe ia mori ndonjë kënge, por kur pamë lotë prej verteti në moll(aqet) e faqeve të tyre, besuam se nuk ishte ajo që dukej.

Sikur të mos mjaftonte kjo, situata desh u përshkallëzua e mund ta bënte të pakthyeshëm dëshpërimin, kur qau vetë Ruçi. O sa fort qau. Qau labçe, me zë. Qau me ligje, pastaj plasi Xhafi e me iso krejt biroja.

Po siç duhet ta merrni me mend, kjo situatë mortuare, elegjiake, e gjitha u konsumua me dyer të mbyllura, brenda mureve prej gome të byrosë.

Jashtë ketyre mureve, aty ku fillon populli, ka vetëm suksese entuziasëm dhe optimizëm.

Në këtë kuadër, ju bëjmë dije se organizatat rilindase, në bashkë-punim të ngushtë me ato kanabiste, dhe shatoret soroiste, bënë një punë të shkëlqyer për sensibilizimin dhe mbajtjen ngrehur të dashurisë e unitetit të popullit me ty e për ty atje në samitin e largët.

Me mësimet e direktivat tuaja në zemër, portretet në dorë, dhe veshtrimin drejt horizonteve të kahershme… populli socialist edhe pse po i digjet “xhani” në pikë të diellit të korrikut, është këtu për të manifestuar mbeshtetjen e përkrahjen rilindase deri në fundgropën e ferrit.

Kemi bindjen e plotë se tya, nuk do ta bëj syri apo ndonjë gje tjetër “tërrt…” para asnjë kërcënimi apo shantazhi.