Letër e Prokop Murrës për Olta Xhaçkën

6 Shtator 2017, 08:56, Aktualitet CNA

E nderuar kolege!

Sapo shoku Edi Rama shpalli se ti do të bëheshe Ministre e Mbrojtjes, këtej në botën tjetër ku jemi ne, më tha shoku Enver që merr vesh çdo gjë që bëhet andej nga ju:

-Shoku Proookooop, a e di se çfarë po bëhet në Ministrinë tënde të dikurshme, a e di se përse e bënë ministre këtë vajzën?

-Jo shoku Enver, nuk di gjë?,- i thashë unë.

-Ajo u bë Ministre e Mbrojtjes sepse burri i saj ka qenë pronar i butik ?Firences? dhe i sillte veshje Edi Ramës. Burrin e bëri deputet, gruan ministre.

-Edhe këtu ku jemi ti merr vesh çdo gjë që bëhet atje, shoku Enver,- i thashë unë.

-Më informon Nexhmija, por tjetër gjë dua të them, shkruaji një letër kësaj vajzës dhe jepi udhëzime.

-Si urdhëron shoku Enver, -i thashë unë.

Dhe ja ku po të shkruaj, sipas porosisë së shokut Enver. Por çfarë të të them moj vajzë. Ti as ushtri nuk ke realisht. E vrava shumë mendjen dhe po të jap një këshillë. Thuaji burrit tënd që merret me biznesin e rrobave të shtrenjta që të të porositë një palë qillota ushtarake si ato që vishnim ne dikur dhe ti veshësh me çizme që të kompensosh mungesën e ushtrisë. Por ti moj vajzë që je e shkurtër dhe e shëndoshë po veshe qillota me çizme do të dukesh si unë. Edhe mua nuk më shkonin qillotat me çizme se isha shumë i shkurtër.

Kur shoku Enver më tha se do të behesha Ministër i Mbrojtjes, mua menjëherë më vajti mendja se do të dukesha keq me qillota. Shoku Enver e kuptoi se kisha një shqetësim dhe më pyeti?

-A ke ndonjë merak Prokop, ma thuaj që tani?

-Një hall kam shoku Enver, i thashë, unë dukem keq me qillota e çizme se jam i shkurtër.

-Edhe Napoleoni i shkurtër ishte, -tha Ramizi.

Shoku Enver ktheu kokën nga ai dhe i tha:

-Ramiz, në kohën e Napoleonit nuk kishte qillota, ishin pantallonat të shtrënguara pas këmbëve.

Nuk më erdhi mirë që e tha këtë gjë Ramizi, se më bëri Napoleon domethënë që kisha qëllime bonapartiste, dmth të bëja grusht shteti si Napoleoni me 18 brymerin që e solli në pushtet.

-Napoleoni jonë është shoku Enver,- i thashë Ramizit.

-As te thembra e këmbës nuk i afrohet Napoleoni shokut Enver që është udhëheqës i proletariatit botëror, -tha Ramiz dhelpra duke e ndryshuar menjëherë pllakën.

-Avash Ramizi, -tha shoku Enver, kështu midis nesh mund ta themi që unë jam si Napoleoni, ndonëse nuk e themi dot publikisht se nuk është parimore.

Dhe kështu unë i vesha qillotat ushtarake me çizme. Prandaj edhe ti vajzë vishi dhe bëhu e para femër ministre në Shqipëri që vishet ushtarake me qillota dhe çizme.

/Citynews