Cila është arritja më e madhe në 104 vite shtet?/ Ja përgjigja e Shpëtim Idrizit dhe Afrim Krasniqit

28 Nëntor 2016, 21:14, Aktualitet CNA

Arritja më e madhe e Shqipërisë në këto 104 vite pavarësi është tematika e diskutimit në emisionin ?Tonight? të gazetares Ilva Tare.

Në 104 vite pas shpalljes së pavarësisë, arritja më e madhe sipas politologut dhe analistit të Ora Neës, Afrim Krasniqi është pavarësia e Kosovës.

?Nëse i marrim vitet kur pati luftë botërore, ngelet shumë pak për të shijuar atë Shqipëri që të parët tanë projektuan. Nëse ne krahasojmë 26 vite demokraci dhe katër vite në vitet ?20, kaq ngelen periudhë shtetëformuese në atë që quhen parametra demokratik. Në aspektin kombëtar, suksesi më i madh është pavarësia e Kosovës. Do të thotë që jemi krenar se kemi dy shtete, por dilema më e madhe është nëse kemi shtete sipas nocioneve ndërkombëtare apo shtete funksionale.

A janë vërtetë shqiptarët të pavarur në aspektin individual? A ndihen të sigurt në vendin e tyre apo janë njerëz që mbijetojnë? Kam përshtypjen se shqiptarët ende mbijetojnë. Fakti që pas 104 vjetësh kemi valë emigrimi dhe kemi probleme të mëdha në vonesa historike për sa i përket procesit të integrimit, tregon se jemi të fundit në histori dhe të fundit nuk janë asnjëherë të gëzuar?, tha Krasniqi

Ndërkohë, kreu i PDIU-së, Shpëtim Idrizi thekson se ajo çfarë i bën përshtypje është mbijetesa.

?Gjëja e parë që më bën përshtypje është sensi i mbijetesës. Ne kemi qenë një popull që kemi qenë në kufijtë e dy botërave dhe të gjithë falangat, gjithë ndryshimet e mëdha në një zonë si Ballkani, Shqipëria ka qenë në valën e parë. Sot ne jemi një vend anëtar i NATO-së, vend kandidat për BE. Jemi dy shtete shqiptare në Ballkan dhe besoj se është një premisë e mirë.

Kemi pasur edhe momente historike që jemi vendosur në kahun e duhur, si lufta për pavarësi e Gjergj Kastriotit Skënderbeut, rreshtimi në kahun e duhur gjatë Luftës së Dytë Botërore, por në kahun e duhur edhe tani. Pozita gjeopolitike e Shqipërisë ka kondicionuar fatin e saj. Ka shumë kombe që nuk i kanë mbijetuar pushtimet e gjatë, duke u asimiluar, por shqiptarët janë një popull vital duke u mbështetur në gjuhën dhe në historinë e tyre dhe kjo është një premisë e mirë dhe t?i bashkohemi vokacionit perëndimor.?, u shpreh Idrizi