Noka: Saimir Tahiri nxorri sekretin hetimor/ Prokuroria ta ndjekë penalisht

16 Shtator 2016, 10:59, Aktualitet CNA

Deputeti i Partisë Demokratike Flamur Noka në një konferencë për shtyp nga selia blu ka akuzuar ministrin e Brendshëm Saimir Tahiri për nxjerrje të sekretit hetimor dhe prishje të hetimit lidhur me avionin e rrezuar ne afersi te Ishmit, Durres. Kjo tha Noka është një vepër penale për të cilën Tahiri duhet të mbajë përgjegjësi. PD i kërkoi prokurorisë të nisë hetimet.

?Saimir Tahiri u kap mbrëmë në shërbim ndaj kartelit të drogës. Ai i dërgoi fjalë trafikantëve se italiani ka filluar të flasë, duke i këshilluar ata që të lëvizin, të marrim masa, të largohen, ti shpëtojnë ligjit. Është pikërisht Saimir Tahiri njeriu që nxori lajmin mbrëmë se piloti italian i rënë me avion në Ishëm, ka nisur të rrëfejë se kishte ardhur për të transportuar drogë e të tregojë porositësit. Saimir Tahiri ka nxjerrë sekretin hetimor, ka prishur hetimet. Kjo është jo vetëm një provë e lidhjes së drejtpërdrejtë me bandat e trafikantët, por është po ashtu një vepër e rëndë penale, për të cilën ai duhet të mbajë përgjegjësi. Partia Demokratike i kërkon prokurorisë ta hetojë me shpejtësi dhe vendosmëri këtë skandal dhe autorin e vërtetë të këtij krimi?, tha Flamur Noka.

Deputeti demokrat tha se nuk janë gazetarët fajtorët por vetë ministri i Brendshëm.

?Krimin nuk e kanë kryer gazetarët që transmetojnë lajmin. Krimin e ka kryer burimi që ka dhënë lajmin. Krimin e ka kryer Saimir Tahiri. I cili prej tre vitesh ka dalluar me të gjitha mënyrat si shërbëtor besnik i bandave të drogës e i trafikantëve, duke u dhënë edhe makinën private, duke djegur provat në laboratorin e shtetit, e së fundmi duke nxjerrë sekretin hetimor?.

Deputeti demokrat tha se kryeministri dhe ministri i Brendshëm u munduan të mbulojnë ngjarjen. ?Karteli i drogës me Tahirin e me Ramën ndërtuan në mes të Shqipërisë një pistë avionësh, 1.5 kilometra të gjatë, ndërkohë që qytetarët nuk rregullojnë dot catinë e shpive të tyre sepse nuk i lejon policia. Karteli i drogës e ka Tahirin edhe zëdhënës, pasi pas denoncimit që unë bëra dje në parlament, ai bashkë me Ramën tentuan ta mohojnë ngjarjen, ta fshehin të vërtetën. Tahiri me pushtetin e ministrit të brendshëm po tregon se është një rrezik serioz për shtetin ligjor në këtë vend, ai eshte rrezik serioz për drejtësinë, për luftën ndaj krimit , dhe luftën ndaj drogës. Ai duhet të merret menjëherë, sot, në ndjekje penale e të japë llogari para ligjit?, theksoi Noka. /Citynews.al