Nga Mentor Kikia/ Mbi maskaradën e lejeve të ndërtimit

23 Korrik 2016, 11:28, Aktualitet CNA

Miq, te njohur e te panjohur!

Pas një shqetësimi që ngrita dje, lidhur me torturën e zvarritjes burrokratike dhe zhvatjen financiare që iu bëhet njerëzve, duke iu referuar konkretisht banorëve në fshatra, për lejet e ndërtimit, ka patur nga ata që, nga pamundësia për të kuptuar, apo ngaqë janë pjesë e ansamblit, ?s?duam as ujë, as shtëpi, vetëm partinë mos na e ngacmo?, kanë krijuar idenë që unë po kërkoj që të ndërtohet kuturru, pra pa leje. Jam nga të paktët gazetarë që e kam ngritur shqetësimin e kaosit urban më shumë edhe se vetë qeveritë në këtë vend, vecanërisht në fshat, ku toka bujqësore është mbjellë anembanë me ndërtime. Problemin që ngrita dje, e kisha për procedurën e lejeve, aty ku lejohet ndërtimi, pra në zonat e urbanizuara. Pikërisht për faktin që edhe për të ndërruar catinë e shtëpisë, edhe për të bërë një copë shtëpi 50 metra katrore, edhe një shtesë dhome, edhe një pallat, edhe një stadium, edhe një qendër tregtare, duhen të njëjtat dokumente. Duhen dhjetra dokumente, nja 10 muaj kohë zyrë më zyrë, noter më noter, dhe nja 10 milion lekë vetëm për letrat e taksat, edhe pse në disa raste investimi kushton me pak se kostoja e lejes. Qeveria dhe bashkitë kanë ngritur një mekanizëm zhvatës e rraskapitës për të dhënë lejen dhe këtë e paguajnë më të varfërit, ata që nuk ndërtojnë gratacela, por një shtëpi për të futur kokën.
Unë e dua rregullin më shumë se ata që kanë shkruar rregullat, por këtë mekanizëm do ta denoncoj sa të mundem. Pasi në vend që ti lehtësojë, qeveria i ngarkon procedurat. Më e fundit është kjo: Inxhinierët dhe studiot inxhinierike që bëjnë projektin teknik, elektrik, hidraulik, sizmiologjik, hidroteknik? duhet të blejnë edhe policën e sigurimit vetëm për llogari të lejes tënde të ndërtimit. Ka vetëm pak javë që është vendosur. A ka ndonjë bir perëndie të më thotë se perse ti që do të ndërtosh shtëpinë në truallin tënd, duhet ti paguash policën e sigurimit inxhinierit që ka projektuar instalimet elektrike? A ka ndojë bir perëndie të më thotë se përse firma e ndërtimit, që paguan të gjitha taksat, duhet të hapë një NIPT sekondar, të posacëm, vetëm për ndërtimin e shtëpisë tënde, e që kushton 2.5 milion leke dhe që duhet rinovuar sërish me mbarimin e vitit kalendarik, me të njëjtin cmim? Dhe këto kosto i pagun ti që do të bësh shtëpinë, apo që do ti ndërrosh catinë shtëpisë që ke.
Nëse dikush i justifikon këto, e shumë më shumë se kaq, atëherë unë i kërkoj ndjesë publikisht qeverisë dhe atyre që janë mërzitur se u kam sharë partinë.