Meta dhe Basha, drejt një aleance/Qeveri teknike dhe zgjedhje të parakohshme

17 Korrik 2016, 11:34, Aktualitet CNA

Kryetari i Kuvendit Ilir Meta dhe Kreu i PD-së Lulzim Basha duket se po shkojnë drejt një aleance politike, aq sa edhe propozimet që bëjnë, i kanë pothuajse të njëjta. Qoftë Basha ashtu edhe Meta, në emër të partive që përfaqësojnë, PD dhe LSI, nisur që nga reforma në drejtësi, nuk pranojnë miratimin e saj pa një konsensus.

Megjithëse deklarimet e bëra nga ndërkombëtarët që nëse konsensusi nuk arrihet, reforma të miratohet, duke i bërë thirrje për përgjegjësi individuale tek çdo ligjvënës, qoftë Basha ashtu edhe Meta përjashtojnë mundësinë e miratimit të saj në një formë të tillë. Madje, Kryetari i Kuvendit, paralajmëroi se nëse mosmiratimi i reformës është një hap mbrapa i madh, miratimi i saj në mënyrë të dyshimtë, do të çonte vendin drejt një destabiliteti politik.

Por edhe në skenarët që do të pasojnë 21 Korrikun, qoftë Basha ashtu edhe Meta kanë të njëjtat qëndrime. Ndërsa Kryeministri Edi Rama, ka paralajmëruar për zgjedhje të parakohshme, përmes një krize politike, në rast se nuk miratohet drafti i reformës, LSI dhe PD përjashtojnë kalimin në zgjedhje me Qeverinë Rama.

Basha kishte propozuar qeveri teknike dhe më pas zgjedhje të parakohshme. Propozimi i bërë nga Basha kohë më parë ka marrë përgjigjen zyrtare sot nga Ilir Meta, i cili tha se pas 21 Korrikut vendi do të ketë një qeveri teknike, mundësisht vetëm me teknicienë, dhe më pas zgjedhjet e parakohshme.

Citynews ka paralajmëruar prej kohësh se LSI do të aplikonte skenarin e rrëzimit të Qeverisë Rama, por me 20 votat e saj në Kuvend, nuk do të lejonte që vendi të shkonte drejt zgjedhjeve të parakohshme, pa pasur më parë një Qeveri teknike. Nëse votave të LSI, i shtohen edhe ato të deputetëve të mazhorancës të pakënaqur nga Rama, veç këtyre edhe votat e PD-së, atëherë në Kuvend krijohet një mazhorancë e re, që mund të votëbesojë një qeveri teknike.

Në anën tjetër, duket se Rama ka një garanci për të vijuar qeverisjen i vetëm, bashkë me PDIU-në, dhe disa deputetë nga rradhët e opozitës, apo aleatit të tij në qeverisje, që mund të votëbesojnë qeverinë, duke përjashtuar mundësinë e një Qeverie teknike. /citynews/