Fatos Klosi: Ambasadori Lu e ka kaluar masën, reforma nuk do të miratohet

17 Korrik 2016, 09:47, Aktualitet CNA

Ish-kreu i Shërbimit Informativ Shtetëror, Fatos Klosi, ka komentuar deklaratën e ashpër të ambasadorit amerikan, Donald Lu, ndaj politikanëve shqiptarë për reformën në drejtësi, dhe tratativat e fundit të opozitës për bllokimin e reformës më të rëndësishme në vend. Ish-kreu i spiunazhit shqiptar pohoi se Donald Lu e ka kaluar masën dhe ka dalë nga roli i diplomatit, i detyruar nga papërgjegjshmëria e politikanëve shqiptarë për të miratuar reformën në drejtësi. Fatos Klosi theksoi se ambasadori Lu dhe ambasada amerikane kanë ushtruar presion të vazhdueshëm ndaj politikës shqiptare, kryesisht opozitës, për të miratuar reformën, në të mirën tonë dhe të vendit. Por, siç thotë Klosi, reformës po i gjenden ?kleçka?, duke bërë që ndërkombëtarëve t?u soset durimi.

?Ambasadori Lu e ka kaluar masën e marrëdhënieve normale; por marrëdhëniet tona me ta nuk kanë qenë normale. Marrëdhëniet tona me ta kanë qenë marrëdhënie patronazhi. Është një partner strategjik që kanë ndihmuar edhe gjatë këtyre viteve. Duke qenë të tillë, ia kanë lejuar vetes që të bëjnë deklarata të tilla. Ky është vetëm njëri faktor. Ndërsa faktori tjetër është humbja e durimit. U bë kaq muaj që merren me ne për të mirën tonë, se ata nuk përfitojnë asgjë. Duket sikur ata po fitojnë ndonjë gjë duke e kaluar këtë masë; ata nuk fitojnë asgjë përveçse që kanë një aleat më të qëndrueshëm që e mbështesin, një aleat që të administrojë mirë shtëpinë e vet. Ndoshta e kanë menduar që një presion i tillë duhet që reforma të miratohet?, u shpreh Klosi.

Ndërkaq, Klosi foli edhe për takimin e radhës mes Ramës dhe Bashës për reformën në drejtësi. Ish-kreu i SHISH thotë se asnjë takim tjetër Rama-Basha nuk do të prodhojë rezultat, ndërsa theksoi se rezultat do të sjellë vetëm vullneti politik. Ai beson se reforma në drejtësi nuk do të miratohet më 21 korrik. ?Problemet zgjidhen me vullnet politik; takimi lidhet me punën e kompromisit. Këtu ka një luftë politike që po bëhet nëpërmjet reformës në drejtësi; po shfrytëzohet kryesisht nga opozita. Nuk besoj se reforma do miratohet. Unë që në fillim do ta kisha aprovuar ndryshe. Do ta miratoja pa konsensus. Kur nuk ka pasur konsensus për Kushtetutën që është më e rëndësishme, nuk është bërë konsensus edhe për reforma të mëdha administrative?, tha Klosi./Sot