Vëllai i Erion Velisë, Arbri është sulmuesi kryesor i portaleve on-line në Shqipëri

6 Shkurt 2016, 08:01, Aktualitet CNA

Përpara se të vinte në pushtet dhe fill pas marrjes së mandatit të Kryetarit të Partisë Socialiste, Edi Rama filloi të ndërtojë një sistem të sofistikuar për kontrollin e medias dhe kurimin në maksimum të imazhit të tij.

Për këtë qëllim pas vitit 2008 ai ngarkoi Endri Fugën, një të ri me një shkollim të gjatë në Angli që të merrte në dorë këtë mision të rëndësishëm.

Nuk janë të pakta rastet që nga ajo kohë kur televizionet dhe gazetat merrnin çdo ditë dhjetra mesazhe të Fugës, por të nisura nga celulari i Ramës ku porositeshin titujt e lajmeve, kritikat për rivalët, histori interesante për Ramën dhe miqve të tij politik.

Shumë gazetarë e mbajnë mend edhe sot atë periudhë kur Rama u bë një ankth i çdo botuesi dhe drejtori medie. Por me ardhjen në pushtet gjërat ndryshuan.

Kundërshtarët politik dhe gazetarët kritik gjetën mënyra të reja për t?ju shmangur censurës së Ramës.

Ata shfrytëzuan internetin për të hapur sitet dhe blogjet informative të cilat deri më sot janë bërë pararoja e shtypit të lirë në Shqipëri.

Fillimisht Rama nuk i priti mirë këto iniciativa.

Ai nuk la vend pa i denoncuar si të paligjshme dhe të dëmshme, madje me urdhërin e tij Top Channel në harkun kohor të dy viteve organizoi disa emisione ku sulmonte faqet informative të internetit.

Duke parë që kjo nismë nuk pati rezultat dhe u kundërshtua nga ndërkombëtarët si censurë, Rama urdhëroi Fugën për të ngritur fillimisht në selinë e Partisë Socialiste dhe më pas e zhvendosi në Kryeministri një grup të rinjsh të shkolluar për IT të cilët filluan sulmin hackers ndaj faqeve të internetit.

Ky grup edhe sot drejtohet nga një ekspert i rëndësishëm i Ramës për kompjutera që ka mbaruar shkollën në USA, i cili është Arbër Veliaj, vëllai i Erjon Velisë.

Për ta shpërblyer për këtë punë kaq heroike duke sulmuar dhe dëmtuar në mënyrë të vazhdueshme faqet kritike në internet, Arbri dhe kompania e tij AEG ka përfituar disa tendera të rëndësishëm publicitar nga Edi Rama, të cilat janë denoncuar edhe gjatë vizitës së Papa Franceskut në Shqipëri.

Arbri i lidhur direkt me Endri Fugën pasi analizojnë çdo ditë lajmet që hidhen në rrjet orientojnë grupin për bombardimin e serverave të faqes on-line me anë të disa kompjuterave të fuqishëm, të cilët emetojnë viruse me kapacitet të lartë imunitar.

Këto sulme kanë shkaktuar jo pak probleme për mediat on-line dhe deri para disa kohësh kur përfundimisht nga ekspertë të huaj u verifikua adresa e sulmit, askush nuk e dinte se IP e sulmit e kishin adresën në Kryeministri.

“Opozita.com”