PD-PS negociata të fshehta për formulën zgjedhore

3 Nëntor 2015, 09:41, Politikë CNA

Artikulimet e mekura, gjatë ditëve të fundit, për ndryshimin e sistemit zgjedhor, në zgjedhjet parlamentare të 2017, kanë shkaktuar një turbullirë, shqetësim dhe trazim në rrethet politike. Bëhet fjalë për mundësinë e implementimit në zgjedhjet e ardhshme të sistemit ?Prim? dhe senatit, duke bërë kësisoj një shartim të sistemit grek, spanjoll dhe italian. Kjo formulë rikthen sistemin bipolar PS-PD, ndërsa bën të panevojshme dhe të parëndësishme të gjitha partitë e tjera, pavarësisht peshës së tyre në elektorat. Ky sistem forcon pozitat e Partisë Socialiste dhe Partisë Demokratike, ndërsa eliminon politikisht dhe largon nga pushteti të gjitha partitë e tjera. Për diversion apo për llogari politike, Sali Berisha dhe Lulzim Basha kanë mbështetur sistemin me Prim dhe senatin, ndërsa kanë identifikuar Edi Ramën si iniciatorin dhe orkestruesin e formulës së re. Qëndrimet e dy kryetarëve të opozitës, sigurisht do të merreshin për diversion, nëse një ministër i Ramës, Bledi Çuçi, nuk do ta mbështeste këtë formulë. Por, diskutimet duket se nuk janë thjeshtë në hedhjen e formulave dhe tezave. Krerët e partive të vogla parlamentare kanë dyshime të forta se Partia Demokratike dhe Partia Socialiste, pavarësisht lojës dhe teatrit publik, në prapaskenë, po negociojnë dhe po bëjnë llogari për formulën e re zgjedhore, përkthimin e sistemit bipolar politik në Shqipëri, sistem i cili ka prodhuar kriza të mëdha se ajo e ?96, ?97, 2009 etj. Kreu i PDK, Nard Ndoka, përfaqësues të PR dhe partive të tjera parlamentare dhe jo parlamentare, kanë hedhur dyshime të forta për bashkëpunim të fshehtë mes PD dhe PS.

Ekspertë zgjedhorë të Partisë Demokratike dhe Partisë Socialiste, janë përfshirë në negociata të fshehta, për të gjetur rrugët e implementimit të sistemit Prim, çka do të ishte një atentat politik ndaj të gjithë partive të tjera, duke nisur që nga Lëvizja Socialiste për Integrim, Partinë për Drejtësi Integrim dhe Unitet, Partinë Republikane etj. Ndonëse të dy kampet politike tregohen të rezervuar për t?u shprehur për formulën e re, mes PD dhe PS kanë nisur bisedimet e fshehta për ndryshimin e Kodit Zgjedhor.

PR: Modeli ?Prim? do sillte sistemin bipolar

Partitë e vogla politike, të spektrit të djathtë dhe të majtë, janë pozicionuar kundër modelit ?Prim?, që kërkon të zbatojë PS-PD në zgjedhje. Sekretari i Përgjithshëm i Partisë Republikane, Arjan Madhi, në një prononcim për gazetën ?Sot?, tha se modeli ?Prim? është i papërshtatshëm për realitetin politik të Shqipërisë. Si ekspert teknik, Madhi sqaroi se ky model do të sillte sistemin bipolar PS-PD dhe do të siguronte vetëm 71 deputetë në Kuvend, ku reformat e rëndësishme nuk do të mund të votoheshin. ?Primi? është një nga modelet e ndryshme që është eksperimentuar në disa vende, me një realitet krejt tjetër nga Shqipëria. ?Primi? nuk është model antidemokratik, por jo i mundur për Shqipërinë. Ky model do të na çonte në një sistem bipolar. Për shkak të një realiteti konfliktual mes dy partive politike, ky model do ishte i pamundur. Por, gjithashtu, 20 % e elektoratit është pozicionuar përtej alternativës PD-PS. ?Primi? do siguronte 71 deputetë. Por, a do të ishte e mundur që të votoheshin një sërë reformash politike??, u shpreh Alimadhi. Sekretari i Përgjithshëm i Partisë Republikane u shpreh se, as OSBE/ODIHR nuk e kërkon që në Shqipëri të ndryshojë sistemi zgjedhor.

Apeli

Alimadhi theksoi se partitë e mëdha politike duhet të zotohen për barazinë e votës, fundin e tregtimit të mandateve, dhe jo të merren me një model që nuk mund ta suportojë dot vendi ynë. ?Në periudhën që jemi sot, ne duhet të rrisim nivelin e dialogut dhe jo ta ngurtësojmë atë. Partitë e vogla i kanë shërbyer ndërtimit të dialogut. Pse po laburohet një gjë e tillë kur kjo nuk kërkohet nga OSBE-ODIHR? Duan të marrin në mënyrë artificiale pushtetin. Duhet të garantohet barazia e votës dhe përfaqësimi në Parlament; duhet të ndalohet tregtimi i mandateve, është shkatërrues i demokracisë?, u shpreh Alimadhi. /Sot