E fundit!

08:16 Aktualitet

Zjarr në fushën e mbetjeve në Krujë/ Tymi toksik përfshin zonën

Fusha e mbetjeve në Krujë është përfshirë nga flakët që ng...

Tërhiqet Nikolla, rikthehet alterteksti me kufizime, ja ligji i ri për arsimin parauniversitar

21 Maj 2015, 07:43, Politikë CNA

Ministria e Arsimit është tërhequr nga propozimi për unifikimin e teksteve në arsimin parauniversitar. Pas kundërshtive të sindikatave dhe grupeve të interesit, MAS ka vendosur që të ndryshojë nenin 6 të projektligjit duke rikthyer altertekstin, por me një kufizim alternativash. Kjo u bë e ditur dje në Komisionin e Medias dhe të Edukimit nga Sekretari i Përgjithshëm i MAS, Plarent Ndreca, i cili u shpreh se reflektimi ka ardhur pas kundërshtive të shoqatave. Me propozimin e ri nuk do të ketë një numër të papërcaktuar tekstesh, por mësuesit duhet të zgjedhin mes tre alternativash. Edhe grupet e interesit propozuan një gjë të tillë, duke thënë se mënyra më e mirë do të ishte kufizimi i altertekstit. Sipas draftit, procedurat e përzgjedhjes së teksteve mbeten po të njëjtat, pasi do të ketë një konkurrim të hapur. Gjithashtu është saktësuar se tekstet do të zgjidhen nga mësuesit në bazë shkolle. ?Tekstet për nxënësit janë alternative, numri i alternativave për çdo lëndë ose fushë të të nxënit, sipas klasave dhe për të gjitha shkollat. Tekstet shkollore sigurohen nga botuesit vendas dhe të huaj dhe certifikohen nga ministria. Tekstet shkollore përzgjidhen nga mësuesit në bazë shkolle?, thuhet në versionin përfundimtar.

Emërimi i mësuesve

Projektligji për arsimin parauniversitar u miratua dje në Komisionin e Medias bashkë me ndryshimet e propozuara, ku është ndryshuar dhe neni 8 i tij, që ka të bëjë me emërimin e mësuesve. Ndryshe nga sa u deklarua ditën e hënë, ku drejtoresha për arsimin parauniversitar në MAS, Zamira Gjini, u shpreh se në procesin e emërimit të mësuesve do të përfshihen prindërit dhe bordet e shkollave, në variantin e propozuar dje bordet nuk janë reflektuar. ?Në institucionin arsimor publik, për një vend të lirë pune, mësuesi emërohet nga drejtori i institucionit arsimor, me konkurrim të hapur. Në komisionet e vlerësimit marrin pjesë përfaqësuesit e prindërve. Procedurat e konkurrimit dhe vlerësimit përcaktohen me udhëzim të ministrit?, thuhet në pikën 1 të nenit 8 të projektligjit. Po ashtu një tjetër pikë që është shtuar është pika tre, që ka të bëjë me shkarkimin e mësuesve. Ky proces do të jetë në dorë të drejtorëve të shkollave, por janë përfshirë edhe prindërit. ?Drejtori i institucionit arsimor publik, fillon procedurën e largimit të mësuesit edhe me kërkesë të prindërve dhe vendos largimin, pasi të konsultohet me përfaqësues të prindërve të institucionit arsimor, sipas procedurave të përcaktuara me udhëzim të ministrit?, thuhet në këtë pikë.

Kurrikula

Një tjetër nen që është ndryshuar nga Ministria e Arsimit është dhe neni 1 i projektligjit, i cili ka të bëjë me kurrikulën. Përkatësisht ka ndryshuar pika tetë, ku saktësohet si është e përbërë kurrikula, ndërsa në variantin e parë nuk ishte një gjë e tillë. ??Kurrikula? është sistem i përbërë nga disa elemente, si korniza kurrikulare, kurrikulare bërthamë, programet mësimore, vlerësimi, me synime arsimore që, të lidhura mes tyre, lejojnë të orientohet dhe të funksionojë sistemi arsimor, nëpërmjet planeve arsimore dhe administrative…?, janë ndryshimet e bëra në pikën 8. Projektligji për arsimin parauniversitar u miratua dje në Komisionin e Medias vetëm me votat e mazhorancës, por nuk munguan debatet dhe përplasjet mes palëve./Sot.com