web counter
LEXO PA REKLAMA!

SHKARKO APP

App Store
Google Play

E fundit!

x

Bojaxhi: Po pëpiqen të krijojnë mosbesim, kështu garantojnë sundimin

17 Maj 2015, 12:51, Politikë CNA

 

Kandidati i pavarur për bashkinë e Tiranës, Gjergj Bojaxhi, ka komentuar nëpërmjet një statusi në Facebook se ai dhe ndjekësit e tij nuk do të ndalen përballë përbaltjes dhe shpifjes nga politika. Bojaxhi shkruan se politika është mësuar që kur dikush i sfidon ata bëjnë ç?të munden në mënyrë që rivali të zhduket nga skena. Kandidati i pavarur nënvizon se çdo ditë ka përpjekje për të krijuar mosbesim në mënyrë që të krijohet përçarje.

Ja cfarë shkruan Bojaxhi:

Përbaltja dhe sulmet kundër karakterit përmes shpifjeve, trillimeve, gënjeshtrës, sharjeve e thashethemeve kanë qenë gjithmonë një nga mjetet më të fuqishme me të cilin regjimet autokratike dhe elitat e korruptuara kanë mbajtur pushtetin e tyre. Skema është e thjeshtë: nëse dikush ngre zërin apo guxon t?i sfidojë, atëherë ai, jeta e tij, familja e tij, shoqëria e tij sulmohen e përbalten deri sa atë ta lërë vullneti e të tulatet sërish.

Kur së bashku i hymë kësaj sfide të vështirë për të ndryshuar qeverisjen e Tiranës, shumë nga ne e dinim që ata që kanë siguruar pushtet e pasuri përmes manipulimit, korrupsionit, grabitjes, keqbërjes e shkeljes së ligjit nuk duan që ne të reagojmë, nuk duan që ne të ngrejmë zërin, nuk duan që ne të veprojmë. Ata na duan apatikë, përtacë, të dëshpëruar, gojëkyçur, mendjembyllur. Ata duan që ne të mendojmë për të ikur nga ky vend e jo për ta ndryshuar atë.

Ndaj ata po përpiqen çdo ditë që përmes shpifjes dhe përbaltjes të mbjellin dyshim e mosbesim ndaj nesh e mes nesh. Sepse mosbesimi na mban të përçarë e të dobët. Sepse mosbesimi garanton mos ndryshimin. Sepse mosbesimi garanton sundimin e tyre.

Por ne, që kemi qenë të ndershëm në jetën tonë e që jemi sot të ndershëm në qëllimin tonë, nuk çkurajohemi. Ne besojmë tek njëri-tjetri. Ne besojmë tek forca jonë për të sjellë ndryshimin.

Ju përshëndes të gjithëve.





Lajmet e fundit nga