Mark Marku: Ligji nuk zgjidh problemet në arsimin e lartë, cenon autonominë

10 Maj 2015, 07:00, Sociale CNA

Pedagogët vijojnë të kundërshtojnë ashpër ligjin për arsimin e lartë në vend. Teksa ministria e ka dorëzuar atë në Kuvend dhe shumë shpejt pritet që të nisë diskutimi në komisionet parlamentare, akademikët bëjnë thirrje për të ndryshuar një pjesë të madhe të neneve të tij. Dje është mbledhur Forumi për Liri Akademike dhe mjaft pedagogë kanë ngritur shqetësimet e ty

re mbi këtë draft. Një ndër zërat e këtij drafti është profesor Mark Marku, i cili dje në prani të të ftuarve ka ritheksuar edhe një herë qëndrimin që mban ky forum dhe problematikat që ai sheh në ligjin për arsimin e lartë. Sipas tij, ky ligj nuk e reformon sistemin arsimor, por përkundrazi cenon autonominë. ?Ka një vit e gjysmë që ne jemi angazhuar në debatin publik, por edhe në debatin universitar për projektligjin për arsimin e lartë.

Që në momentin e parë ne e kemi cilësuar këtë ligj si një ligj që nuk zgjidh problemet e arsimit të lartë. Nuk e reformon arsimin e lartë. Nuk u përgjigjet nevojave për reformim të arsimit të lartë. Dhe mbi të gjitha si një ligj që cenon rëndë autonominë e universitetit. Kundërshtimet kryesore të forumit kanë qenë për marrëdhëniet mes bordit dhe institucioneve të zgjedhura. Dhe për rolin shumë të madh që marrin agjencitë e krijuara nga qeveria në kontrollin e universitetit?, është shprehur Mark Marku.

Në prani edhe të një eksperti nga Brukseli, pedagogu i Gazetarisë është shprehur gjithashtu se një tjetër problem është se mungon modeli se ku është bazuar ligji në fjalë. Në të njëjtën linjë ishte dhe eksperti belg, dhe sipas Markut, ai justifikoi qëndrimin e pedagogëve. Ndër të tjera Marku është shprehur se ligji është bërë për interesa të caktuara dhe nuk përmirëson botën universitare. ?Qëllimi i lëvizjes sonë është të arrijmë në një ligj të standardeve evropiane.

Ne vazhdimisht e kemi diskutuar se cilit model i referohet dhe vazhdimisht e kemi kërkuar të na tregohet se kujt modeli i referohet projektligji. Pasi ne duke pasur parasysh modelet evropiane kemi dyshuar që ky model reflekton standardet evropiane. Dhe ky ka qenë shqetësimi ynë. Përgjithësisht nuk është një model, por është një miks. Një ligj i fragmentarizuar që shpreh interesa të caktuara. Që në thelb shpreh mungesën e një vizioni evropian për arsimin?, është shprehur Marku. Edhe pedagogë të tjera kanë qenë në të njëjtën linjë me të.