Si të dekorojmë shtëpinë për festat e fundvitit

28 Dhjetor 2022, 13:34, Trending CNA

Pema
Vendosja e pemës është një moment i veçantë për të gjithë pjesëtarët e familjes veçanërisht për fëmijët. Pema mund të dekorohet në mënyra të ndryshme, por për t’u dukur sa më bukur dhe për t’u përshatur me ambientin e shtëpisë duhet të ndjekim disa këshilla.

Nëse jetojmë në një shtëpi apo apartament të vogël, duhet të heqim disa mobilje në mënyrë që të krijojmë një hapësirë për vendosjen e pemës.

Vendi më i mirë për të është salloni, në mënyrë që të gjithë të ftuarit ta vërejnë sapo të hapet dera.

Nëse kjo hapësirë nuk ekziston në sallon atëherë pema mund të zhvendoset në një ambient tjetër në mënyrë që mos të pengojë as lëvizjen në shtëpi.

Nëse zbukurimet që i keni vendosur pemës ju duken të pamjaftueshme atëherë mund të shfrytëzoni disa nga idetë e mëposhtme për të dekoruar pemën tuaj.

Një pemë e ndezur me drita shumëngjyrëshe krijon menjëherë atmosferë tjetër në shtëpi dhe gjithçka rreth e rrotull e bën më të bukur dhe më të ngrohtë. Dritat e vogla të bardha janë të njohura tashmë si një traditë e përvitshme, por mund të blejmë edhe drita në ngjyra të ndryshme, blu, të kuqe, të kaltra etj. Zbukurimi i pemës me vargun e dritave duhet të fillojë nga poshtë, në mënyrë që të ketë afër edhe ndonjë prizë elektrike. Më pas, vendosini dritat në formë spirale.

Zbukurimet

Pema e Krishtlindjeve, nëse nuk ka zbukurimet, nuk ka asnjë vlerë. Ndaj, edhe kur mundësitë janë të pakta, disa gjëra të vogla mund t’i bësh edhe vetë. Përdor kopsa, kristale, letra shumëngjyrëshe, pambuk etj. Mos harroni të vendosësh yllin në krye të pemës. Është një simbol tradicional i yllit të Davidit, që çoi tre njerëzit e mençur për të gjetur vendlindjen e Jezusit. Po ashtu, mund të vendosësh në pemë një engjëll, një flokë dëbore ose gjithçka tjetër si dekorim festiv.

Dekori në fund të pemës

Poshtë pemës mund të vendosësh një tapet të bardhë, në mënyrë që të duket si një sipërfaqe toke e mbuluar nga bora. Vendos dhuratat rreth e qark pemës në mënyrë të çrregullt. Mos harro kafshët. Animacioni është shumë i preferuar këtë vit.

Çorapet e kuqe

Çorapet janë një element tjetër mjaft i rëndësishëm. Mund të jenë edhe çorape të punuara me dorë. Përdor fjongo të kuqe dhe të gjelbra, pasi janë ngjyrat që simbolizojnë festën. Është mirë që çdo anëtar i familjes të ketë çorapen e vet. Vendosi bashkë pranë oxhakut!

Dekoro derën me një kurorë Krishtlindjesh

Bli një kurorë të bërë me gjethe bredhi të freskëta ose artificiale. Një kurorë do ta bëjë shtëpinë të duket më e dashur për Krishtlindje. Po ashtu, mund të bësh një kurorë me tela ose plastike që mund ta përdorësh edhe pas sezonit festiv.

Drita në natyrë

Nëse ke pemë të vogla ose shkurre në oborr, mund të vendosësh disa drita në formë rrjete, duke i hedhur ato mbi shkurre. Konsideroje si një ide të zgjuar blerjen e dritave në formë copash akulli që rrinë të varura mbi derë.

Vendos qirinj në dritare

Nëse në stilin tuaj është delikatesa dhe qetësia, vendosja e një qiriu elektrik në çdo dritare të shtëpisë, do të ishte një ide e bukur pa shumë shpenzime.

Flokë dëbore prej letre

Fëmijët e adhurojnë borën për festa. Ndaj do ishte ide e bukur të merreshin me krijimin e këtyre formave, që mjafton t’i ngjisësh në dritare./ CNA.al