web counter
LEXO PA REKLAMA!

SHKARKO APP

App Store
Google Play

E fundit!

x

Abuzime me fondet e IPARD në Maqedoninë e Veriut/ Vihen në pranga 5 persona për ryshfet

11 Nëntor 2025, 19:53, Kosova & Bota CNA

Abuzime me fondet e IPARD në Maqedoninë e Veriut/ Vihen në pranga

Policia e Maqedonisë së Veriut ka arrestuar drejtorin e Agjencisë Shtetërore për Pagesat e Ndihmës Kombëtare dhe Komunitare për Zhvillimin Rural, Ilia Stoilev, me akuzën e ryshfetit me qëllim miratimin e paligjshëm të financimit për një ndërmarrje bujqësore në vend.

Stoilev, i cili vjen nga partia në pushtet VMRO-DPMNE, dyshohet se ka rënë dakord me një ish-ministër të vendit për të marrë shumën prej 50,000 eurosh me qëllim miratimin e një subvencioni nga për një ndërmarrje bujqësore në pronësi të këtij të fundit.

Financimi vjen nga fondet e programit IPA/IPARD i Bashkimit Evropian, i cili mbështet veprimet për zhvillimin rural në vendet kandidate.

Kreu i Agjencisë u arrestua në flagrancë teksa merrte 400 euro si paradhënie të shumës totale. Katër persona të tjerë janë arrestuar në të njëjtin rast. Të pesë të arrestuarit u lanë në paraburgim.

Përfituesit e ndihmës së BE-së janë kryesisht fermerë, blegtorë dhe investitorë në sektorin bujqësor, si dhe kompani përpunuese.

Pas zbulimit të skandalit, qeveria e Maqedonisë së Veriut njoftoi pezullimin e pacaktuar të të gjitha fondeve për përfituesit e programit të BE-së, derisa të përfundojë hetimi i rastit. Kryeministri Hristijan Mickoski tha se pezullimi ishte i nevojshëm për të kontrolluar të gjitha parregullsitë e mundshme, pasi ka dyshime se raste të ngjashme kanë ndodhur edhe në të kaluarën.

Partia Social Demokrate (SDSM) e opozitës akuzoi qeverinë e Mickoskit për “korrupsion të përhapur gjerësisht”, duke paralajmëruar se vendi rrezikon të humbasë rreth 100 milionë euro nga fondet e BE-së për sektorin bujqësor, ndërsa shtoi se mijëra fermerë në vend do të mbeten pa subvencione të BE-së.

Partia gjithashtu argumentoi se vendimi për pezullimin e fondeve në fakt erdhi nga vetë BE-ja dhe jo nga qeveria e Mickoskit, ndërsa kërkoi dorëheqjen e Ministrit të Bujqësisë.

Duke iu përgjigjur kësaj, Mickoski theksoi se Bashkimi Evropian nuk ka bllokuar fondet për sektorin bujqësor në Maqedoninë e Veriut, duke argumentuar se iniciativa për një pezullim të përkohshëm ishte një vendim qeveritar, i cili u mirëprit edhe nga Komisioni Evropian.

Nga ana e tyre, delegacioni i BE-së në Maqedoninë e Veriut tha se Komisioni Evropian ka kërkuar informacione shtesë nga institucionet kompetente të vendit dhe shtoi se BE rezervon të drejtën për të marrë masa parandaluese për të mbrojtur interesat e saj financiare.

Burime diplomatike thanë se përfshirja e Zyrës Evropiane Kundër Mashtrimit (OLAF) në hetim nuk përjashtohet dhe se nëse gjenden parregullsi në lidhje me ndarjen e fondeve të BE-së, Maqedonia e Veriut mund të detyrohet të kthejë paratë në BE. /CNA





Lajmet e fundit nga