Zguro: Nuk kam krisje me Memellin, jam i dëmtuar

10 Nëntor 2022, 22:32, Sport CNA

Zguro: Nuk kam krisje me Memellin, jam i dëmtuar

Vangjel Zguro

Skënderbeu e sheh ende larg kreun. Me dy barazimet e fundit, skuadra është “ngujuar” në vendin e 5-të. Veç mungesës së fitoreve, ambientin po e trazon shumë edhe mungesa e kapitenit. Që pas atij zëvendësimi me Burrelin, Vangjel Zguro nuk e ka prekur më fushën.

Një vendim që ka sjellë edhe “ftohjen” mes tij dhe Migen Memellit. E megjithatë, në klub e kanë mohuar me forcë këtë gjë. Ishte Ardjan Takaj i pari, i cili kundërshtoi që të kishte ndonjë prapaskenë, por edhe vetë trajneri.

Tani vjen radha e vetë lojtarit që të hedhë dritë mbi mungesën e tij që zgjat prej një muaji. Në një prononcim të intervistës së dhënë për “Panorama Sport”, 29-vjeçari tregon se është i dëmtuar dhe mes tij e teknikut nuk ka asgjë.

Zguro, prej një muaji nuk jeni pjesë e ekipit. Çfarë po ndodh?

Çfarë mund të ndodhë tjetër me një lojtar që është i dëmtuar. Kam problem në kavilje që pas ndeshjes me Burrelin dhe ende sot vijoj punën veçmas dhe terapi riaftësuese.

Flitet për një krisjeje me trajnerin Memelli. Ndonjë koment?

Nuk ka asnjë çështje “Zguro” në ekip dhe për këtë ju siguroj. Nuk ka krisje me askënd, pavarësisht çfarë flitet dhe çfarë mund të aludohet. Unë jam i dëmtuar dhe kam kryer të gjitha vizitat mjekësore për të parë shkallën e dëmtimit. Çdo gjë që flitet nuk mund të jetë e vërtetë pa një bazë logjike.

Çfarë ka dalë nga këto kontrolle?

Kam një problem në kavilje që kërkon një fazë rikuperimi nga 3 në gjashtë javë. Ndaj po vijoj me punë individuale dhe terapi që zhvillohen në përputhje me planin e riaftësimit nga klubi. Mbetet për të parë pas Botërorit se si do të ecë rikuperimi im.

Skënderbeu nuk po merr dot maksimumin në ndeshjet e fundit, si e keni parë ju nga tribuna?

Të them të drejtën më vjen keq që ekipi pa mua në fushë nuk po arrin dot të shkojë tek objektivi dhe rezultatet e kërkuara. Normalisht duhet të kishim më shumë pikë dhe nëse bën një bilanc, një situatë e tillë nuk është normale për kërkesat e Skënderbeut. Por gjithsesi, jemi ende në garë dhe mendoj se gjithçka mund të ndryshojë në javët në vijim.

A ka forcë realisht ky grup të rimëkëmbet pas zbritjes në renditje?

Skënderbeu ka lojtarë cilësorë dhe aftësi në grup që mund të ecë përpara. Jam i bindur se do të dinë të reagojnë që në ndeshjen e radhës. Është një grup me kualitete dhe një farë eksperience për të tilla situata. Ndaj mendoj se ka kohë për rikuperim.

Kur mund ta shohim Zguron sërish me ekipin?

Të mbyll fillimisht rikuperimin. Për fatin e mirë mbetet edhe një ndeshje dhe më pas është pushimi për Botërorin. Deri atëherë shpresoj të kenë ndryshuar disa gjëra. Sidomos në rikuperimin tim nga dëmtimi. Por nuk mund të them asgjë me siguri. Duhet të shohim se si do të ecë procesi i rikuperimit.