Tjetër fitore me përmbysje, Milani ëndërron kualifikimin në Champions

9 Maj 2025, 23:16, Sport CNA

Tjetër fitore me përmbysje, Milani ëndërron kualifikimin

Milani regjistroi një tjetër fitore me përmbysje në kampionat. Kuqezinjtë triumfuan me rezultatin 3-1 ndaj Bolognas dhe ëndërron vendin e katërt në renditje.

Pjesa e parë u mbyll me rrjeta të paprekura dhe me raste të pakta për shënim nga të dyja ekipet.

Pas pushimit, Bologna kaloi në avantazh në minutën e 49-të. Një pasim i gjatë u devijua me kokë nga Thijs Dallinga drejt Orsolinit, i cili e kontrolloi topin dhe goditi saktë në cepin e portës, duke mposhtur portierin Maignan. Goli i pësuar shërbeu si sinjal alarmi për Milanin, që reagoi menjëherë me disa zëvendësime.

Në fushë u aktivizuan Samuel Chukwueze dhe Santiago Giménez, të cilët dhanë një ndikim të menjëhershëm. Në minutën e 66-të, një aksion i ndërtuar pas një fitimi topi në mesfushë përfundoi me asist të Christian Pulisic për Giménez, i cili e dërgoi topin në rrjetë mes këmbëve të portierit Skorupski. Vetëm pak minuta më vonë, sulmuesi meksikan e gjeti sërish rrjetën, por goli u anulua për pozicion jashtë loje.

Milan vazhdoi presionin dhe në minutën e 79-të kaloi në avantazh. Një aksion në krahun e majtë i nisur nga portieri Maignan dhe i ndërtuar me kombinime mes Chukwueze dhe João Félix përfundoi te Pulisic, i cili shënoi me qetësi pas një devijimi nga mbrojtja kundërshtare. Goli i tretë erdhi në minutat shtesë, me Chukwueze që asistoi sërish për Giménez, i cili kësaj here realizoi me saktësi dhe vulosi fitoren.

Fitorja i jep Milanit një shtysë të rëndësishme në garën për kualifikim në Champions League, ndërsa ata regjistrojnë një tjetër përmbysje sezonale, duke e çuar në 22 numrin e pikëve të fituara pas disavantazhit fillestar, më shumë se çdo skuadër tjetër në kampionat. Bologna, nga ana tjetër, jo vetëm që humbi një mundësi historike për të realizuar dopietën sezonale ndaj Milanit pas 85 vitesh, por gjithashtu rrezikon të humbasë terren në garën për zonën Champions, në një fund sezoni që pritet të jetë shumë i ngjeshur në pjesën e sipërme të tabelës.

Milani renditet në vendin e tetë me 60 pikë, 3 më pak se Juventusi i vendit të katërt.