web counter
LEXO PA REKLAMA!

SHKARKO APP

App Store
Google Play

E fundit!

x

Sukses i veçantë për McLaren në Formula 1, në Hungari triumfon Norris

3 Gusht 2025, 17:40, Sport CNA

Sukses i veçantë për McLaren në Formula 1, në Hungari

Lando Norris triumfoi në çmimin e madh të Hungarisë. Britaniku regjistroi fitoren e gjashtë sezonale dhe të tretën në katër garat e fundit.

Piloti i McLaren, pavarësisht një nisjeje jo të mirë nga rreshti i dytë, përmbushi pritshmëritë falë një strategjie efikase të vetëm një ndalese në bokse.

Oscar Piastri, shoku i skuadrës së Norris, përfundoi garën në vendin e dytë. Australiani në fund tentoi ta shtynte fort ndaj britanikut, por nuk arriti ta parakalonte.

Charles Leclerc që e nisi garën nga “pole position”, udhëhoqi për rreth gjysmën e xhirove, por u penalizua nga një strategji joefektive e ndalesave dhe probleme me qëndrueshmërinë e makinës. Në xhiron e tretë, Ferrari aplikoi goma të tipit hard, të cilat rezultuan joefikase në temperaturat e pistës. Sipas komunikimeve me radio, piloti shprehu pakënaqësinë për mosrespektimin e rekomandimeve të tij nga boksi, ndërsa përmendi probleme me stabilitetin e shasisë.

Në xhirot e fundit, ai u parakalua edhe nga George Russell i Mercedes-it, i cili përfitoi nga performanca më e qëndrueshme e makinës së tij në fund. Megjithatë, Rusell mori një penalizim prej pesë sekondash për pengim ndaj Leclerc, ndërsa e mbylli garën në vendin e tretë.

Fernando Alonso, me makinën e Aston Martin, përfundoi në vendin e pestë, duke zhvilluar një garë të qëndrueshme, pa gabime dhe me menaxhim të mirë të ndalesave. Më pas, në vendin e gjashtë u rendit Bortoleto me Sauber, i cili për herë të parë këtë sezon përfundon në zonën e pikëve të larta.

Fitorja e Norris ishte gjithashtu e veçantë për McLaren, pasi shënon triumfin e 200-të në historinë e kësaj skuadre në Formula 1. Një arritje që e vendos ekipin britanik në një tjetër nivel simbolik në statistikat e garave më të rëndësishme të botës së automobilizmit.





Lajmet e fundit nga