E fundit!

10:01 Kronika

Armë, kokainë dhe kanabis në zonat bregdetare/ Arrestohen dy persona

Policia e Vlorës ka finalizuar operacionin e koduar “Sigur...

Dominim total, Skënderbeu bind ndaj Besës. Korçarët fitojnë me përmbysje

2 Gusht 2025, 20:52, Sport CNA

Dominim total, Skënderbeu bind ndaj Besës. Korçarët

Skënderbeu triumfoi 3-1 ndaj Besës, në miqësoren e zhvilluar në Korçë. Dy ekipet që do të jenë rivale në Kategorinë e Parë, sfiduan njëra-tjetrën në prag të nisjes së kampionatit.

Besa ishte e para që konkretizoi një prej aksioneve në zonën kundërshtare. Në minutën e 20-të, pas një lëvizjeje të shpejtë në krahun e djathtë, Chinedu përfitoi nga një pakujdesi në prapavijën korçare dhe me një goditje të saktë e çoi topin në rrjetë, duke kaluar kavajasit në avantazh.

Pavarësisht golit të pësuar, Skënderbeu nuk ndryshoi qasjen ndaj ndeshjes. Skuadra korçare dominoi në zotërimin e topit dhe në ndërtimin e aksioneve, por në pjesën e parë nuk arriti të finalizojë përpjekjet në mënyrë efikase. Përveç disa tentativave nga distanca dhe disa ndërhyrjeve të sakta nga portieri i Besës, fraksioni i parë përfundoi me rezultatin minimal 1-0 për skuadrën nga Kavaja.

Në pjesën e dytë, Skënderbeu ndryshoi ritmin dhe qasjen, duke rritur intensitetin dhe presionin në zonën kundërshtare. Puna e bërë në qarkullimin e topit dha rezultat në minutën e 53-të, kur Ukiçi realizoi një gol të bukur nga jashtë zone. Goditja e tij precize nuk i la asnjë mundësi reagimi portierit kundërshtar.

Pas golit të barazimit, Skënderbeu nuk u ndal së kërkuari përmbysjen. Loja u zhvendos kryesisht në gjysmëfushën e Besës, ndërkohë që trajnerët e të dy skuadrave kryen disa ndërrime për të testuar elementë të ndryshëm në fushë. Avantazhi për korçarët erdhi pas një aksioni të mirëorganizuar nga krahu i majtë. Zenullari dha një krosim të saktë në zonë dhe Tayo u ngjit më lart se të gjithë, duke goditur me kokë për golin e dytë të vendasve. Me këtë realizim, Skënderbeu përmbysi gjithçka dhe mori avantazhin.

Besa dhe Skënderbeu goditën nga një herë shtyllën, në përpjekje për të ndryshuar rezultatin. Në fund kishte vend edhe për një gol të shënuar nga Gjini, i cili vulosi shifrat në 3-1.

Skënderbeu e riktheu disi besimin pas humbjes 4-0 që pësoi disa ditë më parë përballë Strugës.

Si Skënderbeu ashtu edhe Besa, kanë si objektiv ngjitjen në Superiore, dhe për këtë arsye çdo minutë loje dhe çdo test i këtij lloji konsiderohet me peshë të veçantë në përgatitjen për sezonin që pritet të jetë i gjatë dhe i luftuar deri në fund.