web counter
LEXO PA REKLAMA!

SHKARKO APP

App Store
Google Play

Spektakël dhe gola në derbin e Milanos, Leao dhe Maignan mposhtin Interin

3 Shtator 2022, 19:58, Sport CNA

Spektakël, gola dhe shumë emocione ka dhuruar derbi i Milanos në ekranin e Oversport dhe Tibo. Zikaltërit kalojnë të parët në avantazh, por kuqezinjtë përmbysin gjithçka me një Leao në superformë dhe fitojnë 3-2 përballjen e parë ndaj rivalëve të qytetit në Serie A. Të dyja skuadrat luftojnë në fushë dhe krijonte raste të shumta, duke e bërë me të vërtetë spektakolar këtë derbi.

Pjesa e parë ka qenë e mbushur me emocione. Zikaltërit kalojnë të parët në avantazh me Brozovic, por Milani luan më mirë dhe barazon menjëherë shifrat me Leaon. Kuqezinjtë shfaqen rrezikshëm në portën e kushërinjve dhe krijojnë mundësi të mira shënimi me Giroud, Tonali, Hernandez dhe De Ketelaere. Mbyllet 1-1 një pjesë e parë e bukur dhe e luftuar në “San Siro”.

Me fillimin e pjesës së dytë Milani kalon në avantazh me Giroud. Francezi merr një pasim të saktë nga Leao në zonë dhe ndëshkon Handanovic. Kuqezinjtë dominojnë ndeshjen dhe duket qartë që Interi është në vështirësi. Leao dhuron spektakël në zonë dhe shënon sërish për Milanin. 3-1 për kuqezinjtë, ndërsa portugezi shënon golin e dytë personal në këtë derbi.

Inzaghi hedh në fushë Dzekon në vend të Correas dhe boshnjaku shënon menjëherë, duke rihapur edhe njëherë këtë sfidë spektakolare. Interi zgjohet dhe i afrohet golit të barazimit me Lautaron, por goditja e argjentinasit përfundon jashtë.

Maignan i mohon golin Lautaros pak minuta më vonë, duke bërë një pritje spektakolare. Tenton edhe Dzeko por është sërish portieri kuqezi që nuk lejon që topi të shkojë në rrjetë. Çalhanoglu provon nga distanca, por është mbrëmja e Maignan, që sërish rezulton vendimtar me pritjen e tij.

Ndonëse mundohen deri në minutat e fundit, zikaltërit nuk arrijnë që të ndryshojnë fatin e kësaj sfide dhe duhet të dorëzohen përballë rivalëve kuqezi, që fitojnë me përmbysje një derbi të madh. 





Lajmet e fundit nga