Skënderbeu reziston me 10 lojtarë, barazim mes spektaklit në Elbasan

26 Tetor 2024, 19:04, Sport CNA

Skënderbeu reziston me 10 lojtarë, barazim mes spektaklit në

Elbasani dhe Skënderbeu, barazuan 1-1 mes tyre, në ndeshjen e vlefshme për javën e 10-të në Superiore. Në “Elbasan Arena”, ishte një ndeshje që kishte gjithçka brenda, përveç fituesit.

Takimi nisi me spektakël që në fillim, me raste të mira për shënim. Në minutën e 5-të, mbrojtësi Prençi kishte mundësinë e artë për të kaluar korçarët në avantazh, por pak metra nga vija fatale nuk shënoi dot, duke gjuajtur jashtë.

Në aksionin e radhës, Elbasani gjithashtu iu afrua golit në tre raste, por asnjë nga lojtarët verdheblu nuk ia doli dot të shënojë.

Në minutën e 29-të, ishte Ermir Rashica, që bëri të shpërthejë festa te korçarët. Pas një lëvizje të bukur nga e majta, sulmuesi u fut në zonë dhe me një gjuajtje të fortë, e ndali topin në rrjetë.

Autogol në “frymën e fundit”, Laçi shtang Tiranën
26 Tetor, 18:59

Tek Elbasani reagimi ishte i menjëhershëm, me Telushin që u ndal nga tranversa në minutën e 33-të, ndërsa në vazhdim Ze Gomesh nuk përfitoi.

Gjithçka u bë më e vështirë për juglindorët në minutën e 43-të, kur Prençi la ekipin me 10 lojtarë, pasi u ndëshkua me karton të kuq.

Vendasit përfituan nga superioriteti numerik dhe u hodhën në sulm, duke gjetur menjëherë golin e barazimit. Në fundin e pjesës së parë, ishte Ze Gomesh, i cili pas një krosimi perfekt të marrë në zonë, gjuajti bukur me kokë dhe e ndali topin në rrjetë.

Fraksioni i dytë i lojës, nisi me Elbasanin më kërkues. Në minutën e 48-të, Alia i mohoi golin Lilës me një pritje spektakolare, ndërsa të njëjtën gjë bëri edhe pak minuta më vonë ndaj Tsagune.

Ky i fudnit ishte i pafat edhe në minutën e 66-të, kur pa gjuajtjen e tij të shkojë ngjitur me shtyllën. 6 minuta më vonë, Gjoni bëri që të shpërtejë festa, duke shënuar golin e përmbysjes për Elbasanin, por u anulua për faull ndaj portierit.

Lushnja “shkatërron” Kukësin 5-0, Flamurtari kryeson i vetëm. Rezultatet dhe renditja në Kategorinë e Parë
26 Tetor, 15:55

Në minutën e 86-të, Bismark kishte mundësinë e artë për t’i dhënë fitoren Skënderbeut, por sulmuesi gaboi gjithçka, duke mos shënuar dot i vetëm me portierin.

Alia i shtangu të gjithë në minutën e 90-të, me një pritje spektakolare ndaj Telushit, nga faulli, ndërsa me të njëjtën situatë u përballe edhe Ze Gomesh dy minuta më vonë.

Për Elbasanin, ky është barazimi i tretë radhazi dhe mban vendin e katërt me 15 pikë, ndërsa Skënderbeu renditet i teti me 11 pikë.