Luhet për finalen/ Tetova pret përmbysjen, Gega: Është bërë ekonomi...

22 Prill 2025, 20:44, Sport CNA

Luhet për finalen/ Tetova pret përmbysjen, Gega: Është

Partizani dhe Egnatia do të përballen në kryeqytet, për sfidën e kthimit në gjysmëfinalen e Kupës së Shqipërisë.

Të kuqtë vijnë disi më të favorizuar në këtë përballje, për shkak të fitores minimale të arritur në ndeshjen e parë.

Në prag të kësaj sfide, trajneri i Partizanit Skënder Gega e vlerësoi maksimalisht ndeshjen, duke thënë se është një mundësi e mirë për Europën. Sipas tij, “demat” e kanë çdo ndeshje si finale.

"Ky rezultat do të thotë që jemi në garë. Kemi arritur një rezultat 1 – 0 po si është një javë nuk është javën tjetër. Egnatia është një ekip i mirë, një ekip me kualitete jemi të vetëdijshëm. Ne vijmë pas një ndeshje me një rezultat jo të mirë dhe gjithsesi nuk mund të punosh me entuziazëm. Jam munduar këto 2 -3 ditë edhe pse koha e ngjeshur të korrigjojmë, analizojmë dhe përmirësojmë gabimet që kemi bërë.

Unë mendoj se për një klub si Partizani çdo ndeshje duhet të ishte finale kupe. E vetmja mënyrë është ti marrësh ndeshjet një nga një, por tani është fundi dhe nuk ka asnjë lloj shansi apo hapësire. Unë besoj se kjo është një ndeshje shumë e rëndësishme.

Pikërisht për këtë luhet. Luhet për Europën, për imazhin e klubit, për interesat çdo gjë është bashkë. Eshtë një garë për tu vlerësuar, në futboll çdo gjë sot është bërë ekonomi tregu çdo klub pa pikësynimet e veta. Nesër do japim maksimumin kjo është shumë e rëndësishme. Jemi gati për çdo lloj situate."

Në të njëjtën linjë ishte edhe heroi i ndeshjes së parë, Albers Keko, i cili deklaroi se fitimi i Kupës është objektiv i Partizanit.

"Eshtë një ndeshje radhe. Shpresojmë t’ia dalim, luajmë në fushën tonë. Jemi ekip i mirë dhe shpresojmë të vazhdojmë të bëjmë prapë mirë siç kemi bërë edhe në ndeshjet dy ndeshjet e kaluara.

Për mua s’është e rëndësishme personaliteti. Për mua e rëndësishme është të fitoj ekipi dhe të kualifikohemi në finale. Normalisht është një ndeshje e vështirë duhet vlerësuar në maksimum. Kupa është objektivi i Partizanit dhe shpresoj t’ia dalim."

Në krahun tjetër, trajneri i Egnatias, Edlir Tetova u shfaq besimplotë për një përmbysje në kryeqytet, pavarësisht humbjes në ndeshjen e parë.

"Sigurisht që është një ndeshje që ekipi ka bërë mirë në lojë, raste, por jo në rezultat. Do mundohemi të jemi më racionalë në ndeshjen e dytë. Duhet të jemi të kujdesshëm sepse nuk ka më ndeshje kthimi, ksështu që gjithçka mbaron.

Kam një grup lojtarësh që dinë çfarë është vështirësia dhe rezultati në disavantazh. Shpresoj shumë te grupi që kam.

Lajm i mirë është rikthimi i Xhemajlit dhe Sotës. Nuk është se kemi vendosur gjë akoma se janë dy ditë shumë afër, ndeshje të ngjeshura me njëra-tjetrën. Sot do shikojmë gjithçka.

Jemi në 99.9% të konkludimit të kampionatit, jemi në vend të parë. Gjendja psikologjike e lojtarëve është optimale, kështu që mendojmë vetëm ndeshje gjysmëfinale nesër."

Sfida Partizani-Egnatia do të luhet këtë të mërkurë, duke nisur nga ora 19:00.