LETONI-SHQIPËRI/ Strakosha pret penalltinë, çfarë ndodhi

10 Qershor 2025, 20:43, Sport CNA

Pas barazimit me Serbinë, Shqipëria sfidon sot Letoninë, në duelin e vlefshëm për kualifikueset e Botërorit.

Kuqezinjtë synojnë me çdo kusht tri pikët, për të mos rrezikuar vendin e dytë, që është edhe objektivi në këtë grup.

Pritet një ndeshje e bukur dhe e luftuar, me Silvinjon që ka bërë ndryshime në prapavijë.

Më poshtë, mund të ndiqni se çfarë ndodh në kohë reale gjatë ndeshjes.

LETONI-SHQIPËRI 1-1

Komenti:

Mbyllet ndeshja!

93’– Rast tjetër i humbur nga Shqipëria. Bajrami hedh një top në zonë, por nuk shfrytëzohet.

80’- Aksion shumë i mirë për Shqipërinë. Manaj lëshon një gjuajtje të fortë me të majtën, por e ndal pa shumë probleme portieri.

69’- Largohet Qazim Laçi, në vendin e tij futet Nedim Bajrami.

68’- Lëvizje e bukur nga Mario Mitaj në të majtë. Mbrojtësi fut një top në zonë, por nuk shfrytëzohet nga asnjëri prej lojtarëve të Shqipërisë.

56’- Gjuajtje e fortë e Asllanit nga jashtë zone, portieri Zviedris e dërgon në këndore.

52’- Mundësi e artë shënimi për Shqipërinë. Ismajli provon me kokë, por pa sukses. Në vazhdim të aksionit gjuan edhe Broja, i cili sheh topin të largohet mbi vijën fatale.

49’- Gol Letonia 1-1! Barazohen shifrat. Shpërblehet këmbëngulja e vendasve, të cilët gjejnë barazimin me anë të kapitenit Cernomodrijs. Gjuajtja me kokë e mbrojtësit, nuk ndalet dot nga Strakosha.

45'- Akordohen 5 minuta shtesë!

41’- Hoxha spastron zonën, pas një krosimi të Ciganiks.

40’- Ndërhyrje e gabuar nga Ismajli në hyrje të zonës. Mundësi e mirë për Letoninë.

39’- Mundësi shumë e mirë për Qazim Laçin. Mesfushori rrotullohet në zonë dhe lëshon një gjuajtje me të majtën, por ndalet nga Balodis.

36’- Pranë golit të dytë Shqipëria. Asllani provon me një gjuajtje të fortë nga jashtë zone, e cila shkon ngjitur me shtyllën

29’- Goooool Shqipëria 0-1! Zhbllokohet sfida. Kuqezinjtë kalojnë në avantazh. Pas një rrëmuje në zonë, përfiton Rey Manaj, i cili e dërgon në rrjetë.

19’- Spektakolar Thomas Strakosha. Portieri i Shqipërisë pret penalltinë e Ikaunieks.

18’- Gabim në prapavijën e Shqipërisë dhe penallti për Letoninë. Ndërhyrje e lehtë në zonë, por arbitri akordon 11 metërsh për faull të Kumbullës ndaj Gutkovskis.

12’- Presing i Armando Brojës në afërsi të zonës. Sulmuesi rrëmben topin dhe pason për Laçin, por gjuajtja e këtij të fundit devijohet dhe nuk shkon në portë.

7’- Cernomordijs rrezikon autogolin për Letoninë. Mbrojtësi devijon me kokë një top të gjatë nga Asllani, por për fatin e tij, topi shkon në këndore.

5’- Lëviz bukur nga e djathta Broja dhe provon me një top në zonë, por largon mbrojtja kundërshtare.

1’- Starton sfida. Luhet vetëm për fitore.